Cân İllerinden Gelmişem Fânî Mekânı Neylerem
1 Temmuz 2021 tarihinde yayınlanmıştır.
NUTK-İ ŞERÎF
Cân illerinden gelmişem fânî mekânı n'eylerem
Ol mülke meylim salmışam ben bu cihânı n'eylerem
Dünyâya geldim gitmeğe 'ilm ile hilme yetmeğe
'Aşk ile ân seyretmeğe ben în ü ânı n'eylerem
Devr-i zamândan doymuşam kevn ü fesâdı koymuşam
Dârü'l-emânı duymuşam bu sicn-i cânı n'eylerem
Hep i'tibârı atmışam 'âşıklığa el katmışam
Ben nefsi Dost'a satmışam bu düşmenânı n'eylerem
'Aşkın şerâbın içmişem dil gülşenine göçmüşem
Ben varlığımdan geçmişem nâm ü nişânı n'eylerem
'Aşkı tabîbim kılmışam derdinde dermân bulmuşam
Ben lübb-i hikmet bilmişem yunâniyânı n'eylerem
Enfâs-i 'aşkı dârikem mâl ü menâli târikem
Genc-i nihâne mâlikem nakd-i revânı n'eylerem
Taht-ı tevekkül bulmuşam mülk-i kanâ'at almışam
Mahfîce sultân olmuşam câh-ı 'ıyânı n'eylerem
Her ne gelirse yahşıdır zîrâ o Dost'un bahşıdır
Çün cümle anın işidir ben bed-gümânı n'eylerem
Olmuş anınla kalmışam 'ayn-ı hayâta dalmışam
Kendim bilip kâm almışam vehm ü hayâli n'eylerem
Gerçi zamân devrân ile pîr etdi cismim şân ile
Gönlüm civândır cân ile pîr ü civânı n'eylerem
Ten beslemekden sapmışam gönlüm serâyın yapmışam
Hurşîdim anda tapmışam ben ahterânı n'eylerem
Yâri bana bes görmüşem ağyârı dilden sürmüşem
Üns ile tenhâ durmuşam ben ins ü cânı neylerem
Dilden dile bin tercemân varken ne söyler bu lisân
Çün cân ü dildir hem-zebân nutk ü beyânı neylerem
Hakkı cemî'-i halkdan müstağniyem billâhi ben
Hallâk-ı 'âlem vâr iken halk-ı zamânı neylerem
İbrâhîm Hakkı Erzurûmî
Kuddise Sırruh
NAĞME-İ AŞK