Cân Kulağın Tut Bana Diyem Nedir Esrâr-ı Tâc
20 Ağustos 2021 tarihinde yayınlanmıştır.
NUTK-İ ŞERÎF
Cân kulağın tut bana diyem nedir esrâr-ı tâc
Evveli esrâr-ı Hakk'dan çün zuhûr etdi bu tâc
Sırr-ı Mevlâ sırr-ı Âdem sırr-ı 'âlem yek cihet
Çün bu sırlardan nişâne sırr-ı Ahmed'dir bu tâc
Hazret-i Cibrîl getirdi sırrı Hakk'dan bî-gümân
Hazret'e birkaç emânet oldu biri de bu tâc
Zât-ı Hakk'a mazhar olan evliyâ vü asfıyâ
Pes bu sırdan feyz alup oldu nasîb anlara tâc
Vâris oldu çün meşâyihler bu sırr-ı a'zama
Ol Habîb'dendir işâret anlara şeyhim bu tâc
Vardırur erkân sırrı ehli bilir anları
Sen sanır mısın âmin-ger böyle bir san'at bu tâc
Hâsseten cümle tarîkin pes usûl-i Halvetî
Bunların erkân-ı sırrına işâret işbu tâc
Çâr terk üzre musavver kırk elif yiğirmi dâl
Bunlar üzre çâr yaprak bir gül ile oldu tâc
Ol gül üzre düğmesi var nokta-ı sırr-ı Ehad
Her birinde var işâret gel basîret gözün aç
Çâr terki dört şeydir terk-i dünyâ birisi
Terk-i 'ukbâ terk-i cennet terk-i nâr oldu ilaç
Pes şerî'at içre îmân 'ahd ü ikrâr sırları
Bunlara oldu işâret pes bu dâllar say ki kaç
Kırk elif oldu işâret erba'în sırrına hem
Pes şerî'atla tarîkat yolları buldu sirâc
Ol gülün çâr yaprak olduğu nişândır dört şeye
Bir şerî'at bir tarîkat bir hakîkatle bu tâc
Birisi de ma'rifetdir pes me'ârif sırları
Keşfolur hem dü cihânda sen de oldun ise tâc
Sırr-ı vahdetden nişâne düğmesi Hû resmidir
Hem dahi bahr-i hüviyyetden vurur her dem mevâc
Her ne kadar tâc-ı pîrân var ise şâhım bular
Her birinde nice bin sır oldu şöyle inzivâc
Kâinât halkından ol rûh-ı pâk-i Mustafâ
Kudret-i sun'uyla nûrdan kandil içre yedi vehhâc
Vâkıf-ı esrâr olanlar der o nûrun resmini
Şöyle san'at eylemiş Sâni' görürsen işbu tâc
Hem işitdin taht-ı 'arşda Hazret-i Veys tâcını
Zincir-i nûrdan asılmış berk urur 'arşa bu tâc
Mü'min olanlar bu sırrı duydu ikrâr eyledi
Hâtimede buldu anlar çün ki îmânda revâc
Levm eden münkir-i nâdân doldu gönlü şirk ile
Korkarım âhir nefesde görüne put ile haç
Pes muhibb olan duyarlar cüz'î küllî sırrını
Bu muhabbetle bulurlar kurb-ı Mevlâ'ya minhâc
Sen dahi 'irfân ü îkân tâlibiysen gel beri
Kendini pes sikkelendir yoluna et indimâc
Sikkesiz zer dahi olsa i'tibâr olmaz ana
Pes erenler sikkesiyle bula gönlün ibtihâc
Sûziyâ gel sikkelendir sâlik-i sâdıkları
Saykal-ı pîr ile bâri gel gönüller pasın aç
Ahmed Sûzî
Kuddise Sırruh