Cânı İster İsen Terk İt Cihânı
29 Temmuz 2024 tarihinde yayınlanmıştır.
.jpg)
NUTK-İ ŞERÎF
Cânı ister isen terk it cihânı
Cihânı terk idenler buldu cânı
Cihânı cânı külli yolda kogıl
Dilersen bulasın kevn ü mekânı
Eğer tâlib isen gence taleb kıl
Nesin görüp seversin bu vîrânı
Bu 'acûz dünyâ-yı mekkârı gör kim
Pâyimâl eyledi pîr ü civânı
Hadîsdir Mustafâ'dan kim işitdin
Âhiret bâkî didi dünyâ fânî
Bu kasr u köşk ü eyvân yahşi dirsin
Oranlarsın özün için evranı
Nice meclis nice işret nice zevk
Nice bir sevesin leb ü dehânı
Nice sen sen nice ben ben diyesin
Nice bir söyleyesin bu yalanı
Nice mağrûr olup yoldan kalasın
Nice bir anmayasın ol vatanı
Bu yurddan âkıbet göçmek gerekdir
Nice bir saklayasın bu kalanı
Gelen gitmek içün geldi cihâna
Bâkî oldur kim oldur câvidânî
Selâtînler cihân harcına dönmez
Sürer bundan fülan ibni fülanı
Cihân zerre değil 'âşık katında
Velî bir deryâdır ki yok pâyânı
Bu pend ü nasîhatdir anlayana
Îsâ'ya bendüvân kıldı sûzeni
Yakîn bildi hâli Kaygusuz Abdâl
Anunçün bî-nişân oldu nişânı
Kaygusuz Abdal
Kuddise Sırruh