MuzafferOzak.com (Türkçe)

KASÎDE DER MEDH-İ HAZRET-İ FAHR-İ KÂİNÂT

Çeker bî-rahmlar yanında her sa'at zebân hançer

Günahım sâbit eyler ölmeğim hâtır-nişân hançer

Zülâl-i vaslına leb-teşneyim bir Türk-i bed-hûyun

Kim andan katre-i âb istesem tartar revân hançer

Verir pervâne öz cânın sana çün ihtiyar ile

Ne hacet şu'leden ey şem' çekmek her zamân hançer

Hazer kıl gezme çok pervâsız ey bülbül ki katlin'çün

Dikenden dâmeni allında ki imiş gül nihân hançer

Müjen kânım döküp gamzen alır cânım 'aceb sanma

İşitir dökse kân ok 'âdetidir alsa cân hançer

Kaşınla gözlerindir her taraf yatar nizâ üzre

Çeküpdür birbirine iki serhoş Türkmân hançer

Hayâl-i gamzen ile beş ki râhat gitdi cismimden

Sanarsın pehlû-yi cânımdadır her üstühân hançer

İletsem hançerin şevkim kabre her bahâr olgaç

Olur sebze yerine hâk-i kabrimden 'ayân hançer

Koçar zerrin kemerle belini veh bu ne tâli'dir

Ki altun kuvvetiyle böyle olmuş kâmrân hançer

Hayâli gözdedir kirpiklerin depretme ey merdüm

Edeb şartı değil mihmâna çekmek mîz-bân hançer

Göz açup bûsitâna hatt-ı sebzinsiz nazar kılsam

Görünür gözlerime sebze-i her bûsitan hançer

Dehânın yok demişler söyle bu güftâr kandandır

Belin peydâ değildi kanda tutmuşdur mekân hançer

Muhâl-i 'akldır kim ola müjgânın kimi hunî

Eğer üstâd elinden su yerine içse kân hançer

Ruh-i zerdim salibdir hançerin gözgüsüne 'aksin

Veyâ simin bilekde tutduğundur zer-nişân hançer

Zebân-i tîz ile ortaya girmiş muttasıl gûyâ

Olam der mâdih-i Peygamber-i âhir-zemân hançer

Şehenşâhî ki tîğ-i âb-dârı zâhir oldukda

Elinden saldı Husrev nîze vü Nûşirevân hançer

Yemen'den baş çekende mehçe-i râyât-i ikbâli

Bırakdı tîre toprağa şeh-i Hindû-sitân hançer

Saf-ârâ-yi mesaff-i Bedr'dir izhâr-i mu'cizde

Şikâf-i perniyân-i Bedr için kılmış nişân hançer

Adû-yi câhının kat'-i hayâtiyçün çeker her ay

Gılâf-ı lâciverdîden hilâl-i âsmân hançer

Seher-feyzî ki dün tek tîre kılmazdı dil-i sâfın

Güneş tek kasdına çekseydi bin nâ-mihr-bân hançer

Sâhi-tâb'i ki ruhsârı siper tek cin bırakmazdı

Eğer kasdına çekseydi kamu ehl-i cihân hançer

Olurdu dîde-i bed-bîne izhâr-i nübüvvetde

Anın gönderdiği her nâme-i mu'ciz-beyân hançer

Gazâlarda du'â-yi cevşenine çâre kılmazdı

Özün her nice kılsa tecrübe tîr imtihân hançer

Eyâ Şâhî ki dâim hancer-i şer'in nizâmiyçün

Çeküpdür bin şehenşeh tîğ ü bin sâhib-kırân hançer

Eğer nâmus-i şer'in olmasaydı halka müstevlî

Ne bir pür-dil çekerdi tîğ ü ne bir pehlevân hançer

Nâkiz-i hükmünün kat'-i fesâdiyçün eliflerden

Kelâmullah bî-hadd tîğ çekmiş bî-kerân hançer

Münâfık edebilmez şer'ine medhal ki çevrende

Melâik perr ü bâlin görse eylerdi gümân hançer

Bi hamdillâh ki hâlâ dîde-i bed-hâha na'tinden

Fuzûli nazmının her satrıdır bir cân-sitân hançer

Zebân-i hâmesi isbât-i i'câzında küffâre

Gehî dil-dûz nâvek gösterir geh hun-feşân hançer

Şefî'ül-müznibînâ mahşer eyyâmı ki dûzahdan

Çeker her şu'le mücrim kasdına bir bî-emân hançer

Budur ümmîd kim mahfûz olam hısn-ı penâhında

Gılâf içre nitekim saklanır görmez ziyân hançer

Fuzûlî

Çeker Bî-rahmlar Yanında Her Saat Zeban Hançer