Cihânda Varlığı Koy Ne Misâfir Ol Ne Mukîm
4 Mart 2023 tarihinde yayınlanmıştır.
NUTK-İ ŞERÎF
Cihânda varlığı koy ne misâfir ol ne mukîm
Ki hâne pür-keder olmuş tarîki hem pür-bîm
Çü ni'meti nekam ü 'izz ü nâzı züll olıcak
Sana ne fâide cism olsa gark-ı nâz ü na'îm
Mezâr içinde olur 'âkıbet sırrın pâmâl
Ne fark olursa külâhın nemed yâhud dihîm
Tarîk-i Hakk'a gidersen tenin za'îf olsun
Ki kat'-ı bâdiye müşküldür olsa merd cesîm
Huyuyla hastayı zanneyler ol tabîb sahîh
Maraz-şinâs değildir nedendir adı hekîm
Hayât-ı cism gönül hoşluğuyla ni'met olur
Ne zevk olursa ola ten sahîh u rûh sakîm
Ne gam ki fakr ü maraz mevt erer tene Hakkı
Olursa cân ü gönül hoş huyuyla sâğ u selîm
Erzurumlu İbrâhim Hakkı
Kaddesallahu Sırrahu'l-Âlî