Cism ü Eşyâya Hakîkat Cân Olan Anlar Bizi
19 Aralık 2020 tarihinde yayınlanmıştır.
NUTK-İ ŞERÎF
Cism ü eşyâya hakîkat cân olan anlar bizi
Gayn u 'aynı terk edüp her ân olan anlar bizi
'Âlem-i kevn ü fesâdın anlayup esrârını
Her nukûşun nakşına elvân olan anlar bizi
İ'tibârîden 'ubûr edüp mecâzı fehm edüp
'Ayn-ı a'yândan görüp seyrân olan anlar bizi
Sırr-ı ekvânı mükerrer seyr edüp seyyâre-veş
Her devirde devr edüp devvâr olan anlar bizi
Külli mevlûdun rumûzun anladık mü'min biziz
Nefs ü şeytânı geçüp insân olan anlar bizi
Nâkıs u kâmil demekden Hakk'a tevbe etmişiz
Nâr-ı vasla cân atup nîrân olan anlar bizi
'İlm ü 'irfândan mu'arrâyız hüviyyet 'aynımız
Mülk-i 'aşka nutk ile sultân olan anlar bizi
Zâhir u bâtın şuhûddan zevkimiz yok zâhidâ
Hâss a'mâl ilm-i ledünne kân olan anlar bizi
Nokta-i bâ-i vücûdun neydüğün bilmez fakîh
Nakl-i te'vîlden geçüp Kur`ân olan anlar bizi
Hâşimâ leffâf olan dehenlere yâr olmazız
Bî-zebân sohbet ile yârân olan anlar bizi
Hâşim Baba
Kuddise Sırruh