Coşup Deryâ-yı Vahdet Mevceler Gevher-feşân Olmuş
23 Kasım 2022 tarihinde yayınlanmıştır.
NA'T-I ŞERÎF
Coşup deryâ-yı vahdet mevceler gevher-feşân olmuş
O gevher şu'lelenmiş mâye-i kevn ü mekân olmuş
O gevher gevher-i pür-feyz-i nûr-ı Ahmediyyetdir
Anın emvâc-ı cûşundan zemîn u âsumân olmuş
Düşün ol bahr-ı nûru şu'le-rîz-i çeşm-i hak-bîn ol
Nasıl bir bahr kim her katre bahr-i bî-girân olmuş
Eyâ fahr-i rusül ey nûr-ı sırr-ı cümle-i eşyâ
Teşekkül-bend olup nûrunla böyle bir cihân olmuş
Bedâyi'-hâne-i tekvînde sensin mebdeü'l-îcâd
Vücûdun feyz-i sârî-i hitâb-ı kün-fe-kân olmuş
Saçılmış lem'a lem'a nakş-ı zerrîn-i kemâlâtın
Felekler sûret-ârâ-yı nukûş-ı pür-niyân olmuş
Tecellî-yâb-ı feyz-â-feyz olup bâlâ-yı 'illiyyîn
Tırâz-ı 'izzetinden 'arş ile kürsî 'iyân olmuş
Nasıl bir feyz-i akdesden hurûşândır ki envârın
Anın her lem'ası meş'al-fürûz-ı ins ü can olmuş
Sen ol sultân-ı evreng-i hidâyetsin ki iclâlin
Ser-â-pâ on sekiz bin 'âleme tuğrâ-yı şân olmuş
Sen ol 'allâme-i 'ilm-i ledünn-i "üdnü minnî"sin
Ki 'ilmin mülk-i 'irfâna şeh-i sâhib-kırân olmuş
Sen ol tâvus-ı bâğ-ı behcet-ârâsın ki Cebrâîl
Senin şevk-ı cemâlinle o bâğa bâğ-bân olmuş
Habîb-i hâss-ı Mevlâ'sın bu yüzdendir ki evsâfın
Cihân-ı 'aşk içinde bir cemâl-i câvidân olmuş
Hudâ-yı lem-yezel kılmış seni bir nüsha-i kübrâ
O nüsha nüsha-pîrâ-yı cihân bâğ-ı cihân olmuş
Mu'allâ sâye-i kudsiyyetin eflâke düşmekden
Bu bir hikmet ki cismin feyz-bâr-ı hâk-dân olmuş
Zemîne fahr içün kâfî değil mi işbu kudsiyyet
Mübârek ravza-i pâkin metâf-ı ķudsiyân olmuş
O ravzan kıbletü'l-âmâl-i ümmet yâ Resûlallah
O ravzan mehbit-i envâr-ı Rabb-i müste'ân olmuş
Seni hakkıyla medh etmek ne mümkün yâ Nebiyyallah
Senin medhin bütün şâ'irlere hayret-resân olmuş
Sana tebcîl içün gökden inüp Kur`àn-ı 'ulviyyet
'Ulüvv-i şânına bir şâhid-i vâlâ beyân olmuş
Sana tekrîm ile hayli melâik nefha-pîrâdır
Sana hep enbiyâ saf-beste-i ta'zîm-i şân olmuş
Senin misbâh-ı feyzinden alır hep evliyâ hattı
Senin misbâh-ı feyzin pertev-i Hakk'a nişân olmuş
Vücûdun 'âlemîne rahmet-i Mevlâ-yı zü'l-in'âm
Füyûzun ümmet-i merhûmene zıll-i emân olmuş
Zalâm-ı hevl-i mahşerde çerâğ-ı şefkatin vardır
Şefà'at nûru minhâcü'l-halâs-ı müznibân olmuş
Ne ümmetdir bu ümmet kim sa'âdetden hıyâbânlar
Çekilmiş re'sine her 'âcizin bir sâyebân olmuş
Ne rif'atdir yanar 'aşkınla kalbim yâ Resûlallah
Ne 'izzetdir bana gözyaşlarım cûy-ı revân olmuş
Meded-hâhım garîbim 'âcizim 'aczimle cûşânım
O âteş-bâ'is-i fahrım ki kalbimde nihân olmuş
Sana bir bendedir Mecdî-i kemter hâk-i pâyindir
Lisân-ı 'aşk ile virdi dem-â-dem el-amân olmuş
Abdülazîz Mecdî Efendi
Kuddise Sırruh