Çün Aşk İle Dinlenmedi Ahbâr-ı Meşâyih

12 Şubat 2020 tarihinde yayınlanmıştır.

NUTK-İ ŞERÎF

Çün 'aşk ile dinlenmedi ahbâr-ı meşâyih

Anlanmadı dünyâda nedir kâr-ı meşâyih

Gün gibi tulû' eyler idi nûr-i tecellî

Açılsa eğer mahzen-i esrâr-ı meşâyih

Deryâ-yı hakîkatde bulunur ola ancak

Her yerde bulunmaz dürr-i şehvâr-ı meşâyih

Keşf olmak olur sırr-ı ilâhî sana ey dil

Artırsa gözün nûrunu dîdâr-ı meşâyih

Halvetlere gir ister isen ravza-yı cennet

Halvet ile çün cennet olur gâr-ı meşâyih

Âdemde basîret eseri olmayıcak ol

Kendi gibi ola sanır ebrâr-ı meşâyih

Her biri olup müctehid-i 'ilm-i ledünnî

Bildinse Hızır'dır sana sâlâr-ı meşâyih

Bir zevk-i ilâhî ala mı 'aşk-ı Hudâ'dan

Vâ'iz eger etmez ise ikrâr-ı meşâyih

Terk eyle efendi gel a evhâm u hayâli

Gösterdi Hudâ yolunu envâr-ı meşâyih

Vahdet meyini nûş idegör kudret elinden

Gör kim nicedir bâde-i hammâr-ı meşâyih

Re'yinde kusûr eylemez ashâb-ı kerâmet

İlhâm ile memdûd olur efkâr-ı meşâyih

Çün nokta-i vahdetdeki ol merkezi buldu

Dönderdi beğim halkayı perkâr-ı meşâyih

Etvâra göre oldu merâtibde çü ahkâm

Hükm eyledi 'âlemlere etvâr-ı meşâyih

Cem' eyledi 'ilmini bulup âb-ı hayâtı

İhyâ-yı kulûb eyledi ahyâr-ı meşâyih

Körler ile haşr ola ol kim görmeye hakkı

Pür etmiş iken 'âlemi âsâr-ı meşâyih

Ey Nûrî eger 'izzet-i dâreyni dilersen

İhlâs ile gel bekle der-i dâr-ı meşâyih

Şeyh Abdülehad Nûrî

Kaddesallahu Sırrahu'l-Âlî