Çünki Bî-illet İnâyetden Nesîm Erdi Seher
13 Ağustos 2019 tarihinde yayınlanmıştır.
MÜNÂCÂT
Çünki bî-'illet 'inâyetden nesîm erdi seher
Bir avuç toprağı insân eyleyüp etdin beşer
Lîk olduk bu tabî'at kûyuna habs-i mukîm
Lutf edüp yazup visâlin ka'besine ver sefer
Bu heves bâdiyesinde eyledin beyhûde seyr
Nefs-i emmâre mugaylânından erdi zarar
Bu lisân-ı levs-i ta'înden mücerred kıl beni
Tâ inâbet âbı birle gusl edem bulam zafer
Bağlanam ihrâm-ı 'aşkın çözmeyeyim tâ ebed
Hem 'ibâdetden tutam dâim miyânımda kemer
Sa'y ile ger teşne-dil olsam safâdır gam değil
Lutf edüp âhir visâlin zemzem ile bir suvar
Tavf-ı kûyunda ebed pergâr-veş tâîf olam
Devr edem dâr u diyârın etmeyem andan güzer
Gerçi bu yolda cehâlât ile biz bîgâneyiz
Ma'rifet kûhunda versen âşinâlık pes nazar
Kıl kerem lutfun Minâ'sında feth eyle bir dükkân
Tâ verem bu gökçe boncuğu alam dürr ü güher
Ger ere senden meded bu 'âcize yâ Müste'ân
Recm-i şeytân eyleyem bulam mekâyidden hazer
Halk idem mûsâ-yı lutfunla başım sevdâların
'Icl-i nefsim anda kurbân eyleyem koyam eser
'Abd-i 'âciz feyz-i 'âmmından recâ etse ne var
Çün doludur anın ile şark u garb u bahr u ber
Şemseddîn Sıvâsî
Kuddise Sırruh