Cürm ü Isyâna Umarız Bakmaya Rabb-i Kerîm
12 Haziran 2022 tarihinde yayınlanmıştır.
MÜNÂCÂT
Cürm ü 'ısyâna umarız bakmaya Rabb-i Kerîm
Sehv ü nisyânımıza estağfirullâhe'l-'azîm
Kıla yolunda refîkimiz sırât-ı müstakîm
Sehv ü nisyânımıza estağfirullâhe'l-'azîm
Levh-i dilden hakkola hubb-i rüsûm-i mâsivâ
Gûş-i câna irişe sırr-ı hüviyyetden nidâ
Vâr iken vech-i Kerîm'in gayre meyl itmek hatâ
Sehv ü nisyânımıza estağfirullâhe'l-'azîm
Hizmetinde gerçi çokdur bizde yâ Rabbi kusûr
Lutf umup kapuna geldik bizi 'afv it yâ Gafûr
Zevk-i vaslından dil-i mahzûna irişe sürûr
Sehv ü nisyânımıza estağfirullâhe'l-'azîm
Fazl u cûduñ bahrine yâ Rabbi yok hadd ü kenâr
Katresi besdir 'usât-ı mü'minîne her ne vâr
Sıdk u ihlâs ile dâim diyelim leyl ü nehâr
Sehv ü nisyânımıza estağfirullâhe'l-'azîm
Hazretinden budur ey sâhib-kerem senden dilek
Seyre mâni' olmaya bu 'arş u ferş ü nüh-felek
Kıl 'inâyet girmeye araya ins ile melek
Sehv ü nisyânımıza estağfirullâhe'l-'azîm
Kıl Fenâyî bendene yâ Rabbenâ lutf u kerem
Bakma taksîrine 'afv eyle hatâsın dem-be-dem
Kalmaya mir`ât-ı dilde dü cihândan hemm ü gam
Sehv ü nisyânımıza estağfirullâhe'l-'azîm
Ehl-i Cennet Mehmed Fenâyî Efendi
Kaddesallahu Sırrahu'l-Âlî