Dâd Elinden Münkirânın Sad Hezâr Feryâd u Dâd
5 Ağustos 2023 tarihinde yayınlanmıştır.
NUTK-İ ŞERÎF
Dâd elinden münkirânın sad hezâr feryâd u dâd
Kim kaçar Hakk'dan görürsün yok bularda i'tikâd
Redd idüp ehlin kelâmın kurb-ı Hakk'dan dûr olup
İblîs-i merdûda dönmüş durmayup eyler 'inâd
Görse bir ehl-i me'ârif rengini tağyîr edüp
Gösterir buğz u 'adâvet eyleyüp cehlin küşâd
Dem urur 'ilm ü 'amelden şöyle kim 'aklınca ol
Lîk kalmış gaflet içre yoklasan bir kuru âd
Bağlanupdur bu arada eğlenüp cehlin ile
Bî-haber şirk-i hafîden âşinâlar cümle yâd
Sâlike itmez tenezzül lîk bilmez kim anı
Kimi beğdir kimi paşa kimisi Sultân Murâd
Gam değildir Nakşiyâ münkir bu yoldan dönmese
Kim bular hayvan gelüpdür eylemez kadrin ziyâd
Nakşî-i Akkirmânî
Kaddesallahu Sırrahu'l-Âlî