MuzafferOzak.com (Türkçe)

NASÎHAT

Dâr-ı rıhletdir bu dünyâ câhına itme gurûr

'Âkıbet ana gelenler cümlesi eyler 'ubûr

Mâlını cem' itme zinhâr hâlini ifsâd ider

Dînini yağmaya virme terk-i dünyâ idegör

Balı semdir mâlı hemdir 'ıyşi gamdır hoşu kem

Dûr ider Hakk'dan seni anın hemân terkini ur

'Âşık-ı sâdık olan itmez ana hîç iltifât

Çün katı mekkâredir süllâki yoldan alıkor

Hakk Te'âlâ mü'mine dünyâyı zindân eylemiş

Sen bu zindânın içinde yapayım dirsin kusûr

Sanma kim bir ferde eyler kahbe zen zerre vefâ

İşleri çün ki demâdem hud'a vü mekr ü fücûr

Var kubûr içre yatan mevtâya kıl bir kez nazar

Anlara ol eylemiş mi hîç vefâ ey gözü kör

Nice bir tâbi' olursun bu hevâ-yı nefse sen

Eğri yola çün gidersin doğrudan idüp nüfûr

İsteme Kuddûsiyâ dünyâda câh u mâlı sen

Çün harâmdır ehl-i Hakk'a dü cihân cennât u hûr

Ahmed Kuddûsî

Kuddise Sırruh

Dâr-ı Rıhletdir Bu Dünyâ Câhına İtme Gurûr