Dem-i İnsân Olupdur Âleme Cân
17 Haziran 2023 tarihinde yayınlanmıştır.
NUTK-İ ŞERÎF
Dem-i insân olupdur 'âleme cân
Ne cânlar cân içinde oldu cânân
Dem-i insân ile devr itdi eflâk
Döner tâ haşre dek durmaz bu devrân
Yürü bir merd-i kâmilden nefes al
Bulam dersen dürr-i deryâ-yı 'irfân
O demdir mahzen-i sırr-ı ledünnî
İrer her dem o demden feyz-i Rahmân
Dem-i insânı vasf itmek ne mümkün
Sezâyî çün anı vasf itdi Yezdân
Hasan Sezâyî
Kuddise Sırruh