Demiş Hakk'ın Resûl-i Bâ-Safâsı
26 Haziran 2022 tarihinde yayınlanmıştır.
NASÎHAT
Demiş Hakk'ın Resûl-i bâ-safâsı
Beher derdin cihânda var devâsı
Günâh derdine istiğfâr devâdır
Ki Mevlâ'nın bize ulu 'atâsı
Devâm eden ana mağfûr olur çün
Çün eyler mağfiret anı Hudâ'sı
Beher gün et yüz istiğfârı zîrâ
Ederdi böyle Hakk'ın Mustafâ'sı
Gelirse başına dünyâda sıklet
Yedi yüz kerredir bil müntehâsı
Murâd hâsıl olıcak yüze indir
Anı terk etme artsın kalb cilâsı
Günâhkârâna istiğfâr emândır
Anınla def' olur cümle belâsı
Günâhkârdır bu ümmet Hakk Gafûr'dur
Demiş hem ol Hudâ'nın âşinâsı
Günâh işlenmede var türlü hikmet
Diyendir asfiyânın pîşvâsı
Yemese dâneyi cennetde Âdem
Olur muydu bize Hakk'ın hüdâsı
Cihân doldu anın zürriyyetiyle
Ki hadsiz enbiyâ vü evliyâsı
Dolar cennet dahi evlâdı ile
Değil beyhûde anın ibtilâsı
Terakkî buldu ol suç ile Âdem
Bu hikmetler içündür ictirâsı
Eder Hakk mağfiret suçun bileni
Günâhı olsa da yer gök arası
Musırr olma günâha çünki Şeytân
O yüzden oldı la'net mübtelâsı
Ana uyan cehennem ehlidir pes
Musırr olanların nârdır cezâsı
Bu Kuddûsî fakîrin pendini tut
Deme kardaş anın sözü n'olası
Ahmed Kuddûsî
Kuddise Sırruh