Der Sitâyîş-i Şeyh-i Ekber Şeyh Muhyiddîn-i Arabî
3 Eylül 2021 tarihinde yayınlanmıştır.
Âfitâb-ı sipihr-i keşf ü yakîn
Pîr-i sôfiyye Şeyh Muhyiddîn
Kutbu'l-aktab 'ârif-i billâh
Menba'-ı keşf ma'den-i telkîn
Server-i sâlikân-ı ehl-i tarîk
Rehber-i hâdiyân-ı 'âlim-i bîn
Mürşid-i hânikâh-ı sôfiyye
Server-i evliyâ imâm-ı güzîn
Mest-i hum-hâne-i mey-i tevhîd
Sâkî-i câm-ı meclîs-i pîşîn
Kimse şerh idemez kerâmâtın
Olsa vassâf-ı nâtıka Pervîn
Rütbesin mesned-i velâyetde
Bilmez illâ gürûh-ı 'aliyyîn
Evliyâ zümresinde müfreddir
Ferd-i vâhid odur 'ale't-ta'yîn
Oldur ol mahrem-i serây-ı kadem
Oldur ol râz-dâr-ı hısn-ı hasîn
Ana keşf oldu sırr-ı 'âlem-i gayb
Ana açıldı perde-i dîrîn
Kadem-i Ahmed'e olup pey-rev
Cümleden akdem oldu bezm-nişîn
Dâhil-i meclis oldu mahrem-i râz
Tek ü tenhâ olup nedîm ü karîn
Habbezâ bir hânkâh-ı tarîk
Ey hoş ol şeyh-i âsümân-ı nigîn
Sayd-gâh-ı 'ulûm-ı bâtında
Oldu tab'ı gözümde bir şâhîn
Rütbe-i ictihâdına anın
İtdi eşrâf-ı evliyâ tahsîn
Tutdu âfâkı sît-i kilki tâm
Eyledi pür bu tâs-ı çarhı tanîn
Gelmedi rûzgâra akrânı
Evvel-i subh tâ-be-şâm-ı pesîn
Lillâhi'l-hamd ravza-i pâkin
Eylemiş şâha rû-yı Şam'ı zemîn
Evvel-i 'ömrden berû hâkin
İtdim efvâh-ı lesme nakş-ı cebîn
Hâir-i merkadin sabâh u mesâ
Eyledim çün tavâf nice sinîn
Lücce-i bahr-i hâletinden anın
Dest-i' irfânım oldu gevher-çîn
Şeyh-i mürşîd olup mürîd-i dile
İtdi irşâd eyleyüp telkîn
Oldum ol servere nazar-gerde
Bâb-ı 'irfân açıldı bana hemîn
Vâsıl oldum murâdıma âhir
Olmadum ye's-i mihnet ile hazîn
Sad-hezârân hezâr hamd itdim
Eyledim ol kadar niyâz u enîn
Remz-res serverâ güşâde dilâ
Ve'y nizâm-ı 'ukûd dürr-i semîn
Sâkî-i câm-ı ma'rifet sensin
Pîr-i meyhâne-i şirrât-ı yakîn
Sensin ol kâşif-i rumûz-ı ezel
Sensin ol 'ârif-i ma'ârif-i bîn
Neşve ver cür'a-i ma'ârif ile
Dili şâd eyle eyleme gam-gîn
Eyle ilhâm-ı sırr ile irşâd
Tâ olam vâsıl-ı makâm-ı yakîn
Nazarun eksik etme üstümden
Ol bana dâimâ zahîr u mu'în
Ente şeyhî ente üstâdî
Leke veccehtü vichetî fi'd-dîn
Koma ben zârı şâm-ı gafletde
Zulmet-i cehl ile dalâl-ı rehîn
Sahk idüp rîze rîze cüz'-i dili
Eyle eczâ-yı ma'rifetle 'acîn
Tâ ide kesb-i feyz-i isti'dâd
Ola cehlin dalâletinden emîn
Buldu haddin niyâz ey Râmî
Eyle engüşt-i hatm-i nazma nigîn
Tâ ki ehl-i fenâ vü fakr ü salâh
Ola âzâde-i gam-ı siccîn
Rûh-ı pâki misâl-i tâir-i kuds
İde seyr u sülûk-i 'arş-ı berîn
Cismi dâim mezâk-ı ahsende
Ola şehd-i na'îm ile şîrîn
Abdurrahmân Râmî Çelebi
Rahmetullahi Aleyh