Derd İle Giryân Olayım Bir Zamân

22 Nisan 2020 tarihinde yayınlanmıştır.

NUTK-İ ŞERÎF

Derd ile giryân olayım bir zamân

'Aşk ile sûzân olayım bir zamân

Rûz u şeb feryâd edüp gül şevkine

Bülbül-i nâlân olayım bir zamân

Erişem şâyed ki bahr-i kulzüme

Katre-i nîsân olayım bîr zamân

Nâr-ı 'aşka cân atup pervâne-veş

Yanayım biryân olayım bir zamân

Gördüğüm Leylâ sanup Mecnûn gibi

Vâlih ü hayrân olayım bir zamân

Kalmayınca tâ vücûdumdan eser

Hâk ile yeksân olayım bir zamân

Vâsıl olunca hakîkat gencine

Yıkılup vîrân olayım bir zamân

Hazret-i Yûsuf'la İsmâ'îl gibi

Kul olup kurbân olayım bir zamân

Zerreler gibi gehi edüp zuhûr

Geh yine pinhân olayım bir zamân

Erişem şâyed sarây-ı vahdete

Tekyede mihmân olayım bir zamân

Cân ü ten kaydından olmağa halâs

Soyunup uryân olayım bir zamân

Azîz Mahmûd Hüdâyî

Kaddesallahu Sırrahu'l-Âlî