Derdin Ey Cân Tabîbi Bana Dermân Olsun
18 Aralık 2020 tarihinde yayınlanmıştır.
NUTK-İ ŞERÎF
Derdin ey cân tabîbi bana dermân olsun
Vereyim vârımı tek mürde dile cân olsun
'Aynımın 'illetine gayrı devâyı n'iderim
Hâk-i râhın gözüme kuhl-i Sfahân olsun
Sulasam kâse-i çeşmimle n'ola yollarını
Garazım bu ki yolun dürr ile mercân olsun
Sürme bîgâne diye bâb-ı keremden şâhım
Kapuna geldi bu miskîni ko mihmân olsun
Âsitânında gedâlar ki olur şâh-ı cihân
Bu gedâna dahi lutf eyle ki derbân olsun
'Iyd-ı vuslat haberin bendeye her kim ki vere
Mürdeye cân verelim sıdk ile kurbân olsun
Dâğ-ı mihrim ki muhabbette nişân etmişdir
Sînem üzre çekeyim ki ana 'unvân olsun
Beni tek kes harem-i kûyuna hergiz varamaz
Beni cezb eyle keremden yolum âsân olsun
Âsitânında senin zerre değildir Şemsî
İltifât eyle şehâ zerreye tâbân olsun
Şemseddîn Sıvâsî
Kuddise Sırruh