Derdine Dermân Soranlar Derd Hemân Dermân İmiş
20 Temmuz 2023 tarihinde yayınlanmıştır.
NUTK-İ ŞERÎF
Derdine dermân soranlar derd hemân dermân imiş
Ma'nâsın bildim anın hem âyet-i Kur`ân imiş
Şübhe etme zâhidâ gel müstemi' ol tevhîde
Zâtını zikr eyleyenler emrine fermân imiş
Cümlesin terk eyle de gel iste anın zâtını
Seni Hakk'dan ayıran oğlun kızın düşmân imiş
"Küntü kenz"in vahdetinden içmişem peymâneyi
Hakk Teâlâ sevgisi 'âşıklara bürhân imiş
Cân gözüyle câna bak sen göresin dîzârını
Zâtına mazhar olan ancak hemân insân imiş
Söyledir ilhâm edüp sen bakma benden gayrıya
Dileği bu nefsimin bi'l-külli hep yalân imiş
Sen gelip 'aşkdan haber sormazsın ey zâhid bize
Hakk'ın esmâ-i sıfâtın bildiren 'irfân imiş
Ben demek lâzım değildir kıssasını İblis'in
Âdem'e baş eğmeyüp kendin gören şeytân imiş
Cân kulağın aç da dinle her nefes güftârımı
Gayrının sevdâsı hep bu cânıma hicrân imiş
'Âlem-i ervâhdayken biz yâr ile hem-râz idik
Lutfunu ihsân eden 'âşıklara Sübhân imiş
Hâlıkın zikr eyleyenler vâsıl olur Hazret'e
Kim gelirse git demez ol bir ulu sultân imiş
Hamdülillâh çok şükür bildim ben anın 'illetin
Rûhumu habs eyleyen cismimdeki sultân imiş
Benliğim benden gidüpdür söyleyen oldur hemân
Durmayup ilhâm eder cânıma ol pinhân imiş
Rü'yetim ta'bîr edüpdür mürşidim Ahmed benim
Hâlık'ın vechindeki envâr bize seyrân imiş
'Akl ile mümkin değildir tevhîdi fehm eylemek
Bir 'acâib bahre düşdüm ma'nâsı vicdân imiş
Cânıma 'aşkdan eser yetmez mi ey zâhid bu söz
Özünü fehm etmeyenler câhil ü nâdân imiş
Âşikâre cânıma görsün diye gösterdi Hakk
Gördüğüm ol 'âlem-i ma'nâdaki Rahmân imiş
Ara yerde zıll-ı şekk mahvoldu doğdu âfitâb
Nûr-ı 'âlem şu'lesinden gördüğüm îmân imiş
'Ârif-i billâh olan anlar Vehâb'ın remzini
Dil ile şerh olmaz ol bir haddi yok 'ummân imiş
Abdülvehhâb Ümmî
Kaddesallahu Sırrahu's-Sâmî