Derdmend-i Ehl-i Derdem Derde Dermân Kimdedir
5 Aralık 2023 tarihinde yayınlanmıştır.
NUTK-İ ŞERÎF
Derdmend-i ehl-i derdem derde dermân kimdedir
Sorduğum 'ayb olmasın lutf ile ihsân kimdedir
Gayrıdan hiç olmaya tevhîd-i zât olsun delîl
Çıkmayam düşem ebed deryâ-yı 'ummân kimdedir
Vechi sırrından haber vire gele hakka'l-yakîn
Cânıma Allah içün âyât-ı Kur`ân kimdedir
Sormağa 'âr itmezem ma'nâ-yı mutlakdır haber
Gönlüm âbâd itmeğe vicdân-ı 'irfân kimdedir
Nâkes uçmak bulmaz imiş ehl olan virsin haber
On sekiz bin 'âlemi levhinde seyrân kimdedir
Biz ki dervîşiz fakîriz derdmend bî-çâreyiz
Taksîrât itmen bize de'n âb-ı hayvân kimdedir
Sâile 'ayb değildir her ne olursa istemek
Kokusu Hakk'dan gelir verd ile reyhân kimdedir
Mü'minin kalbinde pinhân adı Ahmed'dir anın
Gizli değil gün gibi ol nûr-ı 'ayân kimdedir
Çağırup feryâd ider dîzâr içün cân bülbülü
Açılup ol gül gibi verd ile handân kimdedir
Aça ol gönlüm gözünü göstere dîzârını
Rûh yüzünden tis'ayı çalmağa çevgân kimdedir
Bir 'aceb kârhânedir kesb eyleyen aldanmadı
Oturam gönlünde anın Hakk'a mesken kimdedir
Vâhid ü Ferd ü Ehad'dan 'ârife budur nidâ
Cânıma ilhâm iden ol nûr-ı Yezdân kimdedir
Sözümüz hatm eyledik lâzım değil bir söz dahi
'Aşka hem-râz olmağa cânımda cânân kimdedir
Tevhîdin ma'nâsına hakka'l-yakîn budur delîl
Sâile rahm etmeğe sadrında îmân kimdedir
Cân ile cânân yüzün gören bilir ahvâlimiz
Vâhib'i hayrân eden şevk ile devrân kimdedir
Maksûdumdur isterim sırr-ı ma'ârif gencini
Nûr-ı sâfîden anın la'l ile mercân kimdedir
'Aşk dilinden Vâhibî eyler hitâb hâl ehline
Tâ Muhammed'den beri sürülen erkân kimdedir
Abdülvehhâb Ümmî
Kaddesallahu Sırrahu's-Sâmî