Devr-i Mevlânâ'da Gayret Hâlet-efzâdır Semâ'
13 Mart 2021 tarihinde yayınlanmıştır.
NUTK-İ ŞERÎF
Devr-i Mevlânâ'da gayret hâlet-efzâdır semâ'
Âfitâbın kursuna teb-lerze-fermâdır semâ'
Bir kademde hûyu hâya hâyi hûya vasl eder
Sırr-ı devr-i çarhdan elbetde bâlâdır semâ'
Şu'le-i cem'-i tecellî "lâ te'ayyün" şa'şa'a
Sâlik-i sâkin-nümâ bir tavr-ı zîbâdır semâ'
On sekiz bin 'âlemi serkeşte isbât etmiş cilvesi
Devr-i Âdem'den beru manzûr-i ma'nâdır semâ'
Ka'be-i kalbin tavâfı remzini isbât eder
Kalb-i tahyîl ile münhal bir mu'ammâdır semâ'
Cümleten eşyâ nidâ-yı "kün"den olmuş âşikâr
Gûş-i hûşu nâya ver kim sırr-ı ihyâdır semâ'
Neşr-i ebdân haşr-ı ervâhın olur enmûzeci
Neş'e-i halk-ı cedîde nefh-i uhrâdır semâ'
Sâha-i mir'ât-i kalb-i sâfdır cevlângehi
Gevher-i galtân-ı bahr-i 'aşk-ı Monlâ'dır semâ'
Bundan a'lâ cem'-i cem'in var mı Gâlib rütbesi
Evliyâ vü ehl-i inkâra temâşâdır semâ'
Şeyh Gâlib Efendi
Kuddise Sırruh