Dîdeler Nûr Olsun Ey Cân Geldi Mâh-ı Ramazân
20 Nisan 2021 tarihinde yayınlanmıştır.
NUTK-İ ŞERÎF
Dîdeler nûr olsun ey cân geldi mâh-ı Ramazân
Her gününde kullara olur nice 'afv u gufrân
Yedi tamu örtülür olmaz suâl ile hisâb
Bezl olur bir demde dahi nice 'atâ vü ihsân
Herkese rahmetler olur kimse mahrûm olmaz
Açılır cennet kapusu zeyn olur cümle cinân
Hâsseten iftâr zamânı ref' olur cümle hicâb
'Ârif olanlar seyr eder nûr-ı cemâl-i Yezdân
Bir deminde nice bin feyz ü füyûzât keşf olur
Mazhar-ı esrâr hep 'âşıkân u sâdıkân
Zâhidâ sâim olursan heft a'zâ ederek
İhsân olur birine bin nice hûr ile rıdvân
Yalınız ekl ile şürbden sâim olsan sôfiyâ
Benzer ol hayvâna kim habs eyleyip vermez saman
Merhabâ ey şehr-i rahmet nûr-ı Hazret merhabâ
'Afv olur seninle cürm ile hatâlar bî-gümân
Sûziyâ gel hamd edelim bu mübârek ay için
Pâk olur cümle günâhdan müznibân u 'âsiyân
Ahmed Sûzî
Kuddise Sırruh