Dilâ Bil Şeyh-i Ekber Nâfe-i Âhû-yı Âlemde
1 Eylül 2021 tarihinde yayınlanmıştır.
NUTK-İ ŞERİF
Dilâ bil Şeyh-i Ekber nâfe-i âhû-yı 'âlemde
Meşâmm-ı cân-güşâd olan katında misk-i ezferdir
Gören sâhib-basîret anı yahûd bî-tevakkuf dir
Bu hâk-i tîreyi zer kılmağa kibrît-i ahmerdir
Ve yâhûd perveriş-yâb-ı nem-i feyz-i Hudâ olmuş
Neyistân-ı hakâyıkda ney-i pür-zevk-i sükkerdir
Veyâ bezm-i ma'ânîde sunulmuş dest-i hikmetden
Safâ erbâbına hakkâ ki bir lebrîz-i sâgardır
O bir serv-i sehîdir bûstân-ı feyz-i Mevlâ'da
Ser-i devlet nişânı 'arş-ı a'lâya berâberdir
O bir gül-gonce-i terdir 'inâyet gülsitânında
Hezârân 'andelîb-i dil anın bûyiyle hoş-terdir
O bir şâh-ı cihân-gîr-i ma'ânîdir ki 'âlemde
Ne denlü vâr ise dil ehli hükmüne musahhardır
Anın her feyzi âb-ı câvidân-ı Hızr'a gâlibdir
Lebinden dâimâ cârî olan ma'nâ-yı kevserdir
N'ola bu devr-i 'irfân içre hatm-i evliyâ olsa
O merkezde velâyet sanma kim gayra müyesserdir
Cüneyd anın tufeyli Bâyezîd anın emekdârı
Şihâb u Necm ana kanber o 'âlî zât-ı Hayder'dir
O bir müftî-i ma'nâ kâdî-i şehr-i velâyetdir
Anın imzâ vü hükmün tutmayan ma'nâda kâfirdir
Hele ben bildiğim Hakkı bugün 'akl ile keşf ile
Velâyet ehli hep tıfl-ı sagîr-i Şeyh-i Ekber'dir
İsmail Hakkı Bursevi
Kuddise Sırruh