Dilâ Mânend-i Ney Dervîş Olup Berg ü Nevâdan Geç
21 Kasım 2021 tarihinde yayınlanmıştır.
NUTK-İ ŞERÎF
Dilâ mânend-i ney dervîş olup berg ü nevâdan geç
Serin âzâd-ı derd-i fikr edüp kayd-ı hevâdan geç
Heves-kârî değildir şân-ı ehl-i 'aşka şâyeste
Şeh-i taht-ı ferâğ ol şuğl-i bî-sûd-i sivâdan geç
Yitirme ortadan ser-rişte-i kârı vü sûzen-vâr
Serin pâ et kenâr-ı hoş-kumâş-ı i'tinâdan geç
Ser-i rişte gibi yektâ vü nerm ü râst u reftâr ol
Güzer-gâhın olursa çeşm-i sûzen bî-mühâbâdan geç
'Abesdir kerde-i eyyâm-ı nâ-hem-vârdan şekve
Safâ-yı vaktini gör güft ü gûy-i nâ-be-câdan geç
Dü-nîm olma ser-â-ser sadme-i tîğ-i tereddüdle
Hemân âsûde-i teslîm olup havf ü recâdan geç
Gelince bezme sôfî al elinden sübha-i virdin
Sunup verd-i ayağı köhne defter mâ-mezâdan geç
Gına-yı çeşmini sermâye-i bâzâr-ı fakr eyle
Hayâl-i hâm celb-i ref' ile renc ü 'ınâdan geç
Geçüp sadr-ı ferâğa çek elin dâd u sitedlerden
Kanâ'atkâr olup endîşe-i renc ü 'ınâdan geç
Likâ-yı minnete âyîne-dâr olma kalender-veş
Kerem et hâcegân-ı dehre ümmîd-i 'atâdan geç
Nedir lutfu o sevdâ-yı visâlin ey dil-i mehcûr
Zamân-ı müjde-i va'de gelince gel vefâdan geç
Sikender-veş ider sevdâsını ser-geşte-i zulmet
Meded bezm-i fenâda 'âlem-i âb-ı bekâdan geç
Sakın ey serv-i bâlâ cûy-i eşkim başdan aşmışdır
Temâşâ-yı gülistâna pul-i kadd-i dü tâdan geç
Yeter ebleh-firîb-i 'âlem oldun sûret-i Hakk'dan
Gelüp insâfa vâ'iz berzah-ı rûy u riyâdan geç
Hemîşe sîne-sâf-ı yâr u ağyâr u bed ü nîk ol
Ne hâsıl mihr ü kîn ü kadh u medh u mâcerâdan geç
Gelirse tîz gelsin duhter-i rez sâkiyâ bezme
Harâb-ı intizâr ider getirme dil-rübâdan geç
Külâh ü hırka-i fakr u fenâ besdir sana zîver
Bu devlethânede ârâyiş-i tâc u kabâdan geç
Geçüp cevr ü cefâdan dil-nevâz olmazsa ol bed-hû
Budur râh-ı selâmet k'ol nigâr-ı bî-vefâdan geç
Murâd ihrâz-ı kurb-i şemseddîn itmek ise tahkîk
Semâ'-ı mevlevîde çenber-i çarh-ı safâdan geç
Çeküp her gûne bâr-ı yâr-ı dil-cûyı tahammül kıl
Reh-i fevz-i rızâsında vücûd u hûn-bahâdan geç
Geçüp sadr-ı serây-ı vahdete Sâkıb nezâketle
Edüp bîgâneyi ednâ bahâne âşinâdan geç
Sâkıb Dede
Kuddise Sırruh