Dilersen Bahr-ı Zâtı Seyr İçün Bir Ma'nevî Zevrâk

2 Mayıs 2019 tarihinde yayınlanmıştır.

NUTK-İ ŞERÎF

Dilersen bahr-ı zâtı seyr için bir ma'nevî zevrâk

Mutahhar kıl derûnu mâsivâdan bahşedüp revnâk

Hayâlât-ı vücûdun hâil-i nûr-i şuhûd oldu

Nikâb-ı cân açılmazsa tecellî eylemez bil Hakk

Rumûz-i ma'nevî-i "kul kefâ"ya vâsıl olmak içün

'Umûmen evliyâya rehnümâdır cezbe-i mutlak

Sıfât u zâtına mir'ât edüp resm-i mezâhirle

Tecellî mevcesinden görünendir nûr-i bahr-i Hakk

Te'ayyünde zuhûrun mazhar-ı cem'iyyet-i esmâ

Vedâ' etmezden 'âlemden bu faslı asla kıl mülhak

Füyûz-i kenz-i lâhûtî senin sırrında mahfîdir

Mutalsam nefs ile olmuş o kenzin cevheri muğlak

Makâm-ı saff-ı evvel, sâfiyet bezmine mi'râc et

Rumûz-i "sâbikû" ile olam dersen eğer esbak

Dil ü cânda enîs ü mûnisin dâim ola Mevlâ

Ki üns-i Hakk'dan oldu lafz-ı insân zâhir-i müştak

Gerekdir dîde-i cân rûy-i cânânı temâşâya

Münevver eyler elbet çeşm-i cânı nûr-i kühl-i 'aşk

Hicâb-ı zulmeti ref' etmek istersen derûnu kıl

Vücûdun garbını şems-i hakîkat perteviyle şark

Sivâlardan selîmü'l-kalb olan Sâmî bulur Hakk'ı

Haremgâh oldu milk-i cânda cânân ile dil ancak

Şeyh Abdurrahmân Sâmî Saruhânî

Kaddesallahu Sırrahu'l-Âlî