Dilersen Zât-ı Hakk'ı Kıl Taleb Âdemden Ey Tâlib

25 Ocak 2019 tarihinde yayınlanmıştır.

NUTK-İ ŞERÎF

Dilersen zât-ı Hakk'ı kıl taleb âdemden ey tâlib

Hakîkatde geçüp bu sûret-i 'âlemden ey tâlib

Hayâl ü 'unsur-i hâdis hadesdir gel tahâret kıl

Habîr olmaksa kasdın vahdet-i akdemden ey tâlib

" Sekâhüm" nisbetiyle rûhu kudsîye edüp tahvîl

Haremgâha harîm ol hürmet-i mahremden ey tâlib

Vücûd-i nûr-i hakkânî dilersen Hakk'da ol fânî

Bu sırdır sırr-ı " kerremnâ" ile ekremden ey tâlib

Menâzil seyr ile mir’ât-ı şems-i zât olur bedrin

Husûfdan kıl hazer seyret reh-i eslemden ey tâlib

Te'ayyündür hicâb-ı halk televvündür nikâb-ı Hakk

Erişüp zât-ı temkîne emîn ol gamdan ey tâlib

Müsemmâ sûretiyle 'âlem-i tafsîl mufassaldır

Şecer âlem semer âdemde mücmel demden ey tâlib

'Urûc et seyr-i ıtlâka tecellî-i mukayyedle

Münezzeh nûr-i zât keyfiyyet ile kemmden ey tâlib

Muhîtdir kudreti sârî gınâ-yı zâtıdır 'ârî

Merâtib feyz-i esmâ cümlesi a'zamdan ey tâlib

Nişânı bî-nişândır Hazret-i Gayb-ı guyûb Sâmî

Şu'ûnâtla zuhûr kenz-i hafâ mübhemden ey tâlib

Şeyh Abdurrahmân Sâmî Saruhânî

Kaddesallahu Sırrahu'l-Âlî