Diri Baba

Kalenderhânesi hân-ı mihmân olup, bu hakîr, âsitâne-i pîrde mihmân olduk. Pîr Merîzât derler ammâ efvâh-ı nâsda Pîr Merzâ derler ve niceler Pîr Mirzâ derler ammâ sahîhi Pîr Merîzât'dır. Yani "Diri Baba" demekle meşhûr-ı âfâk-i İrân u Tûrân-zemîndir. Ammâ "Merîzât" lügati güft-i Fârisîde "bükülmüş" demekdir. Hakikatü'l-hâl bir kûh-ı bâlânın zeylinde bir azîm âsitâne-i sa'âdet içre bir kûşede seccâde-nişîn olup bizzât vücûd-ı şerîfleri hırka-i peşmîneleriyle kemer-beste olup çömelüp oturur. Vech-i şerîfleri kıbleye nâzırdır. Ser-i sa‘âdetleri savma'asının bir kayasına dayanıp durur. Hâlâ vücûd-ı şerîfleri beyâz pembe-misâl çürümeyüp ter ü tâze durur. Cümle huddâmları azîzi hayâtda bilüp şeb u rûz hizmetinde olup çârûb-keşlik edüp âsitâne-i sa'âdetin pâk edüp her gece azîzin yanına leğen ve ibrik mâ-i zülâl ile pür eyleyüp seher olunca ibriki tehî bulurlar. Ve bu kadar yüz yıldan berü hırka-i şerîfi üzre bir şemme ve zerre gerd-i gubâr düşmez. Ve âsitâne-i sa‘âdeti dâ’imâ ûd u amber râyihasından cemî‘î züvvârın dimâğ-ı dil-meşâmları mu‘attar olur. 

Bu der-i devlet-me’âbı Şeyh Safî Hazretleri Erdebîl'den gelüp bu sultânı ziyâret etdikde azîz hazretlerinin üzerine on aded Azerbaycân hazînesi sarf edüp bir tekye-i Bektâşiyân etmişdir kim misli meğer şehr-i Meşhed'de İmâm-ı Mûsâ Rızâ Âsitânesi ola. Ta‘rîf ve tavsîfden müberrâ bir âsitâne-i ra‘nâdır. Atabe-i aliyyesinden içeri cümle züvvâr dâhil olunca âdeme bir heybet, vücûduna bir lerzân vâki' olur. Gûyâ bir mücrim âdem huzûr-ı pâdişâhîye varır, öyle bir mehîb rûhâniyyetli makâmdır. Hamd-i Hudâ ziyâret eyleyüp bir Yâsîn-i Şerîf, Hakk rızâsı içün tilâvet edüp sevâbın rûh-ı azîze hîbe edüp rûhâniyyetinden istimdâd taleb edüp âşnâlık kesb etdik. Lâkin âsitânesinde târîh olmamakla intikâli senesi ma‘lûmımız değildir. 

Ammâ tekye-nişîni Hoca Salâhaddîn, sâhib-i hâl, her şeyden münzevî ve fâriğu'l-bâl bir kimesne-i zâldir, anlar hikâyet etdi. Azîz Hazretleri Şeyh İbrâhîm Şirvânî hazretlerinin mü’ezzinliği hizmetinde imişler. Ol kadar riyâzât u mücâhede ile erenlere ermişler kim arş-ı azîm horozunun bangın istimâ‘ edüp evkât-ı hamse ezânın tilâvet edermiş. Şeyh İbrâhîm Hazretleri bu azîzin arkasın sığayup "Merîzât Merîzât" buyururlarmış. Anınçün cesed-i şerîfleri çürümeyüp ter ü tâze seccâde-nişîn olup durur. Gûyâ hayâtda murâkabeye varmış bir vâ‘iz ve nâsıhdır. Her kim ziyâret edüp rûh-ı şerîfi içün bir Fâtiha-i seb‘u'l-mesânî tilâvet ederse elbette yedi günde dünyevî ve uhrevî hayr murâdâtı hâsıl olur. Ve nice bin keşf u kerâmâtları zâhir u bâhir olmuşdur. Kaddesenallahu bi sırrıhi'l-azîz.