Dünyâ Talebiyle Kimisi Halkın Emekde
2 Mayıs 2020 tarihinde yayınlanmıştır.
HİKMET
Dünyâ talebiyle kimisi halkın emekde
Kimi oturup zevk ile dünyâyı yemekde
Yok derdine bir çâre ede mîr ü gedâda
Sen çekdiğin âlâmı gerek sakla gerek de
A'yân-ı cihândan kerem umma anı sanma
Âsâr-ı 'atâ ola ne paşada ya bekde
Matbahlarına aç varan âdem değenek yer
Derbânları var göz kapuda el değenekde
Bir devrde geldik bu fenâ 'âleme biz kim
Âsâr-ı kerem yok ne beşerde ne melekde
Ağyâr vefâdan dem urur yâr cefâdan
Âdemde vefâ olmaya vü ola köpekde
Evc-i feleğe basdı kadem câh ile câhil
Erbâb-ı kemâlin yeri yok zîr-i felekde
Yâ Rab bize bir er bulunup himmet eder mi
Yoksa günümüz böyle felâketle geçer mi
Bağdadlı Rûhî
Rahmetullahi aleyh