Eğer Ârif İsen Cânâ Tefekkür Kıl Bu İnsânı
3 Mart 2023 tarihinde yayınlanmıştır.
NUTK-İ ŞERÎF
Eğer 'ârif isen cânâ tefekkür kıl bu insânı
Neler halk eylemiş Mevlâ nazar eyler çü rûhânî
Vücûdu çâr anâsırdan yapılmış zâhir-i hey'et
Bu heft âzâ ile tertîb ü tanzîm kılmış ebdânı
Veren alan eden kılan yapan düzen bu eşyâyı
Kamusu kendidir billâh eğer 'ârif isen tanı
Nikâb örtmüş bu unsurdan ki kendi zât-ı pâkine
Kurup bir taht-ı bâlâyı eder emr ile fermânı
Verâ-ı perdede işler cemî'-i san'atın dâim
Sanırsın zâhirâ lu'bet-bâz ya cânbâzdır eder anı
Kimin bir haddi vardır ki çöpü kımırdada yerden
Ya bir sinek aça kanadını ansız bula cânı
Basîretle nazar etsen ki birdir cümle-i mevcûd
Ki birden gayrı fânîdir olan bâkî çü Yezdânî
Bekâ bulan o Bâkî'yle özü bâkî-dürür elbet
Fenâ bulmaz o cân cânânı buldu oldu insânî
A Sûzî sen dahi bâkî olam dersen bekâya gel
Bulagör çün bekâbillâh cismânî vü rûhânî
Ahmed Sûzî
Kuddise Sırruh