Ehl-i Derd-i Nâtüvâna Var mı Sıhhatden Lezîz
17 Nisan 2019 tarihinde yayınlanmıştır.
NUTK-İ ŞERÎF
Ehl-i derd-i nâtüvâna var mı sıhhatden lezîz
İbtilâ-yı fakr ile muhtâca ni'metden lezîz
Pertev-endâz-ı cemâl-i nûr-i Hakk âyînesi
Dil-rübâ-yı cân ile hem-bezm-i sohbetden lezîz
Bî-kedûret feyz-i sâfî nûr-i bahşâ-yı derûn
Tâ'at-ı Hakk'dır hemîn olmaz ibâdetden lezîz
Dîde-i 'aşkdır gören 'ayn-ı safâ etse cefâ
Rûh-i 'uşşak bulamaz 'aşk ile zilletden lezîz
Firkat-i cânsûz-i hicrân ile mescûn olana
Var mı bî-gam-ı ferahrîz harf-i vuslatdan lezîz
Sadme-i lüccî-i evhâm ile küştî-i dile
Mümkin olmaz sâhil-endaz-ı selâmetden lezîz
Ya'kûb-i cân dîdesini feth için yok çâre-sâz
Yûsuf-i ma'nâ kamîsi ile nisbetden lezîz
Nâr-ı 'aşk ehline vermez zevk u râhat mâsivâ
Lezzet-i nûr-i şühûd her türlü lezzetden lezîz
Mihver-i mîm-i muhabbetdir medâr-ı vasl-ı Hakk
Sâmiyâ olmaz dü 'âlemde muhabbetden lezîz
Şeyh Abdurrahmân Sâmî Saruhânî
Kaddesallahu Sırrahu'l-Âlî