Ehl-i Derdin Derdine Dermân Olur Vakt-i Seher
21 Nisan 2021 tarihinde yayınlanmıştır.
NUTK-İ ŞERİF
Ehl-i derdin derdine dermân olur vakt-i seher
Haste-dil 'âkillere Lokmân olur vakt-i seher
'Âşık-ı dîdâr olanlar rûz u şeb feryâd eder
Âh u zârla dîdesi giryân olur vakt-i seher
Dost cemâli şem'ine pervâne-veş cevlân eden
Âteş-i 'aşka yanıp biryân olur vakt-i seher
Hâne-i dil hâlî olur kesret-i ağyârdan
Tahtına teşrîf eder yâr mihmân olur vakt-i seher
Çün hicâbın keşf eder mahbûb yüzünden ol zamân
Tâlib-i sâdıklara seyrân olur vakt-i seher
Hasret-i yâr ile terk-i hâb eden cânlar o dem
Kâm aluben vâsıl-ı cânân olur vakt-i seher
Her ne türlü müşkil-i dil vâr ise arz eylegil
Feth oluben cümlesi ihsân olur vakt-i seher
'Ârif-i âgâh olanlar nîm şeb bîdâr olur
Mahrem-i seyr mazhar-ı Yezdân olur vakt-i seher
Sûziyâ ger âşinâlık ister isen Dost ile
Lutf-ı cânân cilve-i pîrân olur vakt-i seher
Ahmed Sûzî
Kuddise Sırruh