Ehl-i Küfrün Devri Geçdi Şimdi Îmân Devridir

20 Mayıs 2020 tarihinde yayınlanmıştır.

NUTK-İ ŞERÎF

Ehl-i küfrün devri geçdi şimdi îmân devridir

Ya'ni yokdur zühde rağbet ehl-i 'irfan devridir

Uyma deccâl-i la'îne şirki ko tevhîde gel

Geldi 'Îsâ-yı zamân mehdî-i devrân devridir

Cehl ile sûret-perestân kaydına olma esîr

Aç gözün şimden geru sîret-perestân devridir 

Râh-ı vahdet ihtiyâr et kesretin kaydını ko

Cezbe-i 'aşk-ı ilâhî ile ihsân devridir

Râh-ı esmâyı bırak sırr-ı müsemmâ kıl taleb

Ko Hudâ-hânlığı sôfî gel Huda-dân devridir

Gel beni keynûnetin aynûnete eyle bedel

Devr-i Mervân geçdi şimdi Şâh-ı Merdân devridir

Kendi özün bilmemek derdi ile haste olan 

Derdmendân-ı kulûba bil ki dermân devridir

Tâc u tesbîh u 'asâ bazârına erdi kesâd

Rind-i rüsvâ-yı melâmet bâde-nûşân devridir

Çille-i halvet içün ta'yîn-i vakt lâzım değil

Şimdi gel kim "külle yevmin hüve fî şe'n" devridir

Cümle a'mâl oldu ten rûh-ı 'ameldir 'aşk-ı Hakk

'Ömrünü tende geçirme şimdi bil cân devridir

Kıble-i eşyâ hakîkat her zaman âdem dürür

Uyma şeytâna sakın kim devr-i insân devridir

Ma'rifet kesb eyleyüp devrini itmâm eylegil

Devr-i insân hatm olıcak sonra hayvân devridir

Zikr u fikrin âdem olsun âdemi bil sen hemân

Nusha-i câmi'dir âdem yani Kur`ân devridir

Gerçi mestûr eylemişdir vahdet esrârın selef

Nicesi mestûr olur keşf ile 'irfân devridir

Zulmet-î cehl içre teşne zâyi' etme kendini

Hızr-ı Gaybî'ye eriş kim âb-ı hayvân devridir

Sun'ullah Gaybî

Kuddise Sırruh