Ehl-i Vahdet Zümresinin Cism ü Cânı Nûr Olur
17 Mayıs 2020 tarihinde yayınlanmıştır.
NUTK-İ ŞERÎF
Ehl-i vahdet zümresinin cism ü cânı nûr olur
Her neye baksa tecellî durduğu yer Tûr olur
Hakk kemâliyle cemâlin eyler anlardan 'ıyân
Bunda Hakk'dan dûr olanlar anda dahi dûr olur
Levh-i mahfûz-i Hudâ oldu kulûbu bunların
Cümle esrâr-ı hakâyık anda hep mestûr olur
"Lî ma'allah" remzi ancak bunlara dâim durur
Sanma bunlar bir nefes tevhîdden mehcûr olur
Câmi'u'l-ezdâd olur bil bunlara feyyâz-ı Hakk
Nice bilinir bunlar kim zâkir u mezkûr olur
Kavl u fi'l ü hulku pâk-evsâf oldu bunların
Anın içün zâhir u bâtınları ma'mûr olur
Râz-ı tevhîdi bunlar ger açmayalar 'âleme
Vahdet-i Hakk cümle halkdan ser-te-ser mestûr olur
Neyler isen eyle cânın 'âşık eyle bunlara
Bunlara 'âşık olanlar dâimâ mesrûr olur
Bunları her kim ki sevmez oldu şeytân-ı la'în
Kim ki hak der bunlara 'âkıbet mansûr olur
Sohbetini bunların her kim ki başa tâc eder
Gün gibi başa çıkar ol 'âleme meşhûr olur
Bunların yüzün görüp sözün işiden cân ile
Gaybiyâ dergâh-ı Hakk'da şübhesiz mağfûr olur
Sun'ullah Gaybî
Kuddise Sırruh