MuzafferOzak.com (Türkçe)

NUTK-İ ŞERÎF

Elâ ey 'ârif-i billâh haber ver mağz-ı ma'nâdan

Elâ ey tâlib-i Allah haber ver sırr-ı esrârdan

Niçündür nokta-i sevdâ niçün emvâc eder deryâ

Niçündür 'ilm-i 'allemnâ haber ver 'ilm-i esmâdan

Nedendir encümün hükmü nedendir kahr ile lutfu

Nedendir keşf ile remzi haber ver sırr-ı şeydâdan

Niçündür "ved-duhâ" sırrı ziyâ-ender-ziyâ sırrı

Kimin'çündür ziyâ sırrı haber ver emr-i rızâdan

Nedendir "kâbe kavseyn"i nedendir cümle ma'nâlar

Nedendir gayr ile 'aynı haber ver sen o ednâdan

Nedendir bu tecellîler nedendir bu tesellîler

Neden ihsân-ı küllîler haber ver gel bu ra'nâdan

Niçündür mâh ile tâbân niçün bunlardaki seyrân

Niçün durmaz bular her ân haber ver seyr-i a'lâdan

Neden Kur`ân'ın elfâzı niçün mahbûb eder nâzı

Nedendir bülbül âğâzı haber ver kûh ü sahrâdan

Neden bu hikmet-i Yezdân nedendir 'afv ile gufrân

Niçün olmaz kamû yeksân haber ver bu müsehhâdan

Neden "Tâ-Hâ" ile "Yâ-Sîn^" neden icrâ olur âyîn

Neden gavgâ ider kâin haber ver cümle eşyâdan

Niçündür Hızr ile Mûsâ rumûzu Meryem-i 'Îsâ

Ne hikmet Âdem ü Havvâ haber ver 'ilm-i Tûbâdan

Nedendir 'âlem-i ma'nâ nedendir sidre-i müntehâ

Bulara Ma'nevî hâlâ haber ver 'arş-ı a'lâdan

Manevî Mustafa Efendi

Kuddise Sırruh

Elâ Ey Ârif-i Billâh Haber Ver Mağz-ı Ma'nâdan