Elâ Ey Server-i Mahbûb Mine'l-Eyni İle'l-Eyni
31 Aralık 2022 tarihinde yayınlanmıştır.
KASÎDE
Elâ ey server-i mahbûb mine'l-eyni ile'l-eyni
Güzel yüzünü 'arz eyle götür yüzden hicâbeyni
Yüzün benven mesânîdir "yerâhu men yerânî"dir
Velâkin "len terânî"dir tahayyertü bi-hâteyni
Sözündür hikmet-i îmân yüzündür rahmet-i Rahmân
Özündür derdlere dermân devâ kıl bi'l-gıyâseyni
Çü sensin es'ad-ı evlâ çü sensin maksad-ı a'lâ
Çü sensin mersad-ı eclâ içimde yak sirâceyni
Ridâ "levlâk" "le 'amruk" tâc kamu şehler sana muhtâc
Benim kapunda yalın aç aç üstüme cenâheyni
Eyâ gönül çü rehber ol kamu halka peyamber ol
Çü sırrullah-ı ekber ol sözüne tut sımâheyni
Ki tâ gözler göre anın serâyında tecellîsin
Kılam cânı nisâr ana sürem dergâha haddeyni
Niyâz içre kapusunda yüzüm toprağa komuşdum
Seherde bir nidâ etdi ki yâ hâzâ bi-hâzeyni
Ki her kim 'azm ide bize gerek kim dünyeden beze
Yana 'aşk oduna sıza bi-nârin beyne nûreyni
Hevâlardan ola çün vâz hevâmızda ide pervâz
Hüviyyetden gele âvâz ki gör Hakk'dan mecâzeyni
Figân etdim ki yâ mahbûb celâlin eşiğinde ben
Esîrem hôr u sergerdân garîbem yok mu ünseyni
Görürsün gözlerim yâşın akar tâ kim göre yüzün
Gönül cân 'aşkın odunda olupdur ke'l-ferâşeyni
Garîbem 'âlem-i kevnden erişdim kapuna fazl it
Götür yüzden hicâbı kim bulam andan halâseyni
Tecellî kıl visâlinden ki yanmışam hayâlinden
Hayâtıma hayât oldur ki senden ire feyzeyni
Pes andan doğdu şems-i zât gönülden inkişâf etdi
Vücûdum külli mahv oldu çün etdi inbisâteyni
Eser kalmadı hiç benden hemîn bir âlem-i toprak
Hitâb etdi bu kez mahbûb türâba bi'l-lihâzeyni
Ki yâ hâzâ şu kim bizi görem derse bu 'âlemde
Tahayyürde kalır cânı idemez ittilâ'ayni
Kapumuzda zelîl ol dur huzû' it elleri bağlı
Ki tâ kim 'aynımız sana 'ayân ola bilâ-'ayni
Çü yâr etdin bizi yâre nazar kılma pes ağyâre
Gözükme dâre deyyâre dilersen inkişâfeyni
Rızâmız iste gel gir sen otur vahdet sarâyında
Ki tâ vuslat şerâbından sunavuz biz revâkayni
Ki zîrâ kimse kim bizden devâ isterse derdine
Devâlar idevüz ana ki görmeye helâkeyni
Visâlimiz zülâlinden içe geçe hayâlinden
Cemâlimiz kemâlinden ire ana visâleyni
"Sekânî şerbeten ahyâ fuâdi sümme ahyâni"
Ki tâ ben Hızr olam câmım bi-'aynin beyne lâmeyni
Pes aldım meşreb-i sâfı şerâb-ı selsebîlinden
Getirdim bir zülâli kim içen terk ide kevneyni
Bu kevserden kim içerse bekâ-i lem-yezel buldu
Vücûdun eyledi tâhir bi-dâdin beyne vâveyni
Tecellî zâtuhû hakkan 'alâ men ya'budu hakkan
Yuhibbu'l-hakka tahkîkan fe hâşâ 'an ilâheyni
Çü geldi seyyidü'l-ebrâr serâ min sırrıhi'l-esrâr
Çü doğdu menbaü'l-envâr tecellâ bi'l-celâeyni
Ki tâ hak-bîn nazar bâyed Muhammed-râ ki der bâyed
Hayâte'l-külli bâz âyed bi-hâin beyne yâeyni
Çü sensin rahmet-i Rahmân çü sensin sübha-i Sübhân
Yazıc'oğluna yaz ihsân anı kurtar mine'l-eyni
Yazıcıoğlu Mehmed Efendi
Kaddesallahu Sırrahu'l-Âlî