Elif Allah İçün Zikr ü Fikrin Dâimâ
21 Ocak 2021 tarihinde yayınlanmıştır.
ELİFNÂME
Elif Allah içün zikr ü fikrin dâimâ
Bâ bu dehrin hâlıkıdır çün Cenâb-ı Kibriyâ
Tâ tevekkül babıdır matlab meğer kim 'âşıka
Sâ sena vü hamd ü şükr et hâline subh u mesâ
Cîm cennetden garaz çün rü'yet-i dîdârdır
Hâ habîbi hürmetiyçün göstere Bârî Hudâ
Hı Hudâ'nın nutkudur "lâ taknetû min rahmetî"
Dâl devletdir bu müjde hâss u 'âmma zâhidâ
Zâl zillet semtine meyl etme 'ısyan eyleyüp
Râ rehâ bulmak dilersen ibtidâ vü intihâ
Zâ zen-i dünyâya meyl etmez o kim merdânedir
Sin sâlimdir gumûm-i dehrden müjde ana
Şın şübhen vâr ise ey tâlib eyle tecrübe
Sad subh u şâmın olsun matla'-i zevk u safâ
Dad dâll olma uyup her dem hevâ-yı nefsine
Tâ tâhir eyle riyâdan kendini ey mübtelâ
Zı zalam-ı şebde bîdâr ol yürü encüm gibi
'Ayn 'ibretle nazar kıl 'âleme hikmet n'ola
Gayn gayret kıl tarîk-i Hakk'da er bir menzile
Fâ ferâgat kûşesinden ola emniyyet sana
Kâf kurbiyyetde ankâ-meşreb ol her vech ile
Kef kerkes-veş dolaşma cîfe-i dehre dilâ
Lâm levh-i dilde tahrîr et nasîhat sözlerim
Mîm maksûdun ola dergâh-ı 'izzetde devâ
Nûn nakd-ı 'ömrünü sarf etme 'âlemde tehi
Vâv vardır kal'a-i nutkumda sûd-ı bî-riyâ
Hâ hidâyet iste Hâdî'den hidâyet bulasın
Lâm-elif lâkayd olur Hakk'dan kula olsa 'atâ
Yâ yeter nazmı uzatma muhtasar kıl pendini
Olmasın bîzâr anı eyleyenler Feyzîyâ
Feyzî