Elif Allah Zâtına Oldu İşâret Mutlakâ
12 Şubat 2021 tarihinde yayınlanmıştır.
ELİFNÂME
Elif Allah zâtına oldu işâret mutlakâ
Hem elif tab'îr-i ülfetdir Hudâ halka şehâ
Bâ bekâdan sâdır olan rûh u cevher ol durur
Kim ana rûhum durur dedi haberde Mustafâ
Tâ tebârek nefs-i küll mevcûd olmakdır delîl
K'ol sebebdir cüz' ü küllün fıtratına ibtidâ
Sâ sübût ider ki senden çok netâyic gelmeğe
'Arş u ferş ü hem 'anâsır hem tebayi'le serâ
Cîm cemâli nûrunu eşyâya saçdı ol cemîl
Tâ ki mevcûd oldular ol dem âdemden bî-hafâ
Hâ hayât-ı Hayy Hakk hayy kıldı eşyâyı tamâm
Tâ müsebbih oldular Mevlâ'ya dâim ey fetâ
Hı hayâl-ı vasl-ı Hakk eşyâya düşdü bî-gümân
Tâ visâli şerbetiyle kana cümle bî-riyâ
Dâl-ı devlet râh-ı 'aşka bunlara oldu delîl
Da'vet ide aslına ervâha olup rehnümâ
Zâl zât-ı bahr-ı Hakk cezebât ile cûş eyledi
Tâ ki râci' ide asla bunları Rabbü'l-a'lâ
Râ Resûl-i rahmet-i Rahmân irüben bunlara
Hâne-i tevhîd kapusuna didi es-salâ
Zâ zülâl-i feyzine kandırdı ervâhı tamâm
Tâ nasîbi ile her biri kanup didi kefâ
Sin sa'âdet mülkine her biri oldu pâdişâh
Kim ana ehl-i tasavvuf didiler dâru'l-likâ
Şın şühûd-ı vech-i mutlakla müşerref oldular
Gördüler kim bâtıl imiş ol ki dirler mâsivâ
Sâd sâim oldular mâ-dûn-i Hakk'dan cümlesi
Hamr-ı vasl-ı dilber ile mest olup buldu safâ
Dâd zamm etdi vücûdun her biri aslı ile
Tâ dalâletden necâtı virdi rahmetle Hudâ
Tı tahâret şerbetin çün nûş kıldılar kamu
Gözlerine gayr-ı Hakk bî-şübhe göründü fenâ
Zı zuhûr-ı vech-i Hakk kıldı tecellî cânlara
Göz açup gördüler eşyâyı kamu doldu zıyâ
'Ayn 'ayn-ı zât gördüler sıfâtın bî-gümân
Pes fenâdan sonra buldu cânları 'ayn-ı bekâ
Gayn gayr-ı zât-ı Hakk mevcûd yokdur gördüler
Bildiler vâhiddedir a'dâd-ı mücmel bâtınâ
Fâ fenâdır sûret-i eşyâ velâkin cânları
Bâkîdir Hakk ile dâim buluban bî-hadd 'atâ
Kâf kâdir kudretin makdûra takdîr eyledi
Tâ ki makdûrât anın ile buldular nümâ
Kef kâfî-i Hudâ her şeye olduğun kefîl
Kâmil olan görüben hükmüne virdiler rızâ
Lâm lutfunu görüp her câna sârî olduğun
Pes didiler "innehû ma'nen" cemî' evliyâ
Mîm Mâlik'i mülki üzre gördüler kim gayrı yok
Bildiler Mâlike'l-mülk'ün durur hükm-i kazâ
Nûn nûr-ı zâtını çün saldı ervâha İlâh
Def' oldu mâsivâ zulmâtı ol dem bî-riyâ
Vâv vicdân-ı vahdetinde cânları gark oldu bil
Tâ velâyet halvetinde buldular bî-reyb câ
He hüviyyetden dinildi "kul hüvallahu ehad"
Ya'ni d'in kim "külli şey'in hâlik illâ vechunâ"
Lâm-elif lâ-raybe kim Hakk'ın durur vârlık hemân
Mâsivâsı zıll-ı zâildir yâ bâd-ı hevâ
Yâ yedullah gayr-ı Hakk vehmin hicâbın ref' idüp
Ey Senî tâ kâim oldu Hakk ile cân dâimâ