Elif Allah'ı Anup Zikr-i İlâh Eyle Gönül
4 Ocak 2021 tarihinde yayınlanmıştır.
NUTK-İ ŞERÎF
Elif Allah'ı anup zikr-i ilâh eyle gönül
Bâ bekâ mülkü içün n'ola bir âh eyle gönül
Tâ temennâ kıluban Hâlık'a râh eyle gönül
Sâ sevâb ister isen terk-i menâh eyle gönül
Cîm cehd ile dürüş hidmet-i Şâh eyle gönül
Hâ hisâb olıserdir tınla kamu yahşi yamân
Hı hacîl olsa gerek ol arada çoklar inân
Dâl dâim üzülür yokdur ana şekk ü gümân
Zâl zikr eyle adın ger vâr ise sende îmân
Râ riyâsız 'amel et Hakk'ı penâh eyle gönül
Zâ zebûn olmıyagör nefs ile şeytâna uyup
Sîn se'âdetle yürü sıdk ile Rahmân'a uyup
Şîn şerî'atla dürüş âyet-i Kur`ân'a uyup
Sâd sarf eyleyegör ömrünü ihsâna uyup
Dâd zâyi' ise pes ömrü tebâh eyle gönül
Tâ tahâret aluban eyle namâzın güzâr
Zı zuhûr olıserdir hayr ile şerrin ne ki var
'Ayn 'âlemde bir iş işlemeden Hakk'a yarar
Gayn gafletde nice bir olasın leyl ü nehâr
Fâ firâkında gözün yaşını râh eyle gönül
Kâf kahrına beli deyen erer lutfa hemîn
Kef kesb eyle dürüş tâ bula hem derdin emîn
Lâm lahd olduğu dem tınla sana ka'r-ı zemîn
Mîm müşkil işini bilmiş olasın o demin
Nûn nehy eyle yeter nâme-siyâh eyle gönül
Vâv varmağa yerin taht-ı türâb olduğunu
He henüz bilme misin dünye harâb olduğunu
Lâm-elif lâ deyene türlü 'azâb olduğunu
Yâ yakîn bil Gazâlî sûr u hisâb olduğunu
Demidir tevbe kılup terk-i günâh eyle gönül