Eltâf-ı Hudâ'ya Mâlikiz Biz
28 Ağustos 2021 tarihinde yayınlanmıştır.
NUTK-İ ŞERÎF
Eltâf-ı Hudâ'ya mâlikiz biz
Esnâf-ı 'atâya mâlikiz biz
Tahdîs-i ni'am beyânı içün
Enva'-ı edâya mâlikiz biz
A'mâl ile şükre 'âciz olsak
Hamd ile senâya mâlikiz biz
Fakr ile çü fahra vâris olduk
Aksâ-yı gınâya mâlikiz biz
Zerrîn kabâyı neyleriz kim
Peşmîne 'abâya mâlikiz biz
Baş eğmek olur mu tâc-ı şâha
Çün semt-i gedâya mâlikiz biz
Ümmetler içinde pür-safâyız
Çün Mustafâ'ya mâlikiz biz
Ashâb ile âline hem
Ta'zîm-i velâya mâlikiz biz
Rafz ehline dilde buğzumuz var
Hubb-i hulefâya mâlikiz biz
Toprak başına hâricînin
Bir Murtazâ'ya mâlikiz biz
Dedik çü belî elest vakti
Ol 'ahde vefâya mâlikiz biz
Sultân-ı serîr-i 'aşka erdik
Ol zıll-ı hümâya mâlikiz biz
Kendüye cihânı bende kılmış
Bir mâh-likâya mâlikiz biz
Ebrûsu işâret âb rûsu
Bir özgece râya mâlikiz biz
Zülfüne asıldı halk-ı 'âlem
Bil dâr-ı belâya mâlikiz biz
Ol dâra visâli yollarında
Cânları fedâya mâlikiz biz
Fânîyi fenâya verdik el-hak
Bâkîde bekâya mâlikiz biz
Devlet biliriz belâ-yı yârı
Lezzât-ı 'anâya mâlikiz biz
Sanma ki esîr-i ekl ü şürbüz
Ruhânî gıdâya mâlikiz biz
Milk oldu gönülde mahv u isbât
"İllâ" ile "lâ"ya mâlikiz biz
Tebdîl-i zemâim eylemekle
Hâl-i büdelâya mâlikiz biz
Gel "tahte's-serâ"da görme gâfil
Çün "fevka'l-'ulâ"ya mâlikiz biz
Koduk cühelâya kıyl ü kâli
Asl-ı fukahâya mâlikiz biz
İlminde rüsûha erdik ey dil
Tahkîk-i hürâya mâlikiz biz
Hükm-i kaderedir ilticâmız
Îmân-be-kazâya mâlikiz biz
Te'vîl-i ehâdîs oldu ilhâm
Ta'bîr-i rü'yâya mâlikiz biz
Zâhid diler ise semt-i irşâd
Minhâc-ı hüdâya mâlikiz biz
Dergâh-ı Hudâ'ya her seherde
İnhâ-i münâya mâlikiz biz
Her bir gecemizde Kadr'e erdik
Billah safâya mâlikiz biz
Evcâf-ı leyâli içre Hakk'dan
İlkâ-i nidâya mâlikiz biz
Geldikde cihât-ı şeşden âvâz
Bir özge sadâya mâlikiz biz
Çün 'ayn-ı ma'iyyet oldu nusret
Tedmîr-i a'dâya mâlikiz biz
"Allahu ma'î"de "el-ma'î"yiz biz
Her demde likâya mâlikiz biz
Def'i elimizde mekr-i sihrin
Esrâr-ı asâya mâlikiz biz
Meclâ-yı müsebbib oldu esbâb
Esbâb-ı semâya mâlikiz biz
Kevneyne cenâbı sığmaz iken
Ol şâha sarâya mâlikiz biz
Hurşid-i cemâl-i pertevinden
Zulmetde zıyâya mâlikiz biz
Âmîn işdüp cemî' şeyden
Evkât-ı du'âya mâlikiz biz
Koduk elimizden ihtiyârı
Ey Nûrî rızâya mâlikiz biz
Abdülehad Nûrî
Kuddise Sırruh