Emreyleyüp Mevlâ Ecel Geldikde
7 Nisan 2024 tarihinde yayınlanmıştır.
NUTK-İ ŞERÎF
Emreyleyüp Mevlâ ecel geldikde
Bunca suâllerim âsân ola mı
Göç yarağın görüp anda vardıkda
Gönül Dost evinde mihmân ola mı
İki cihân fahri derdin dermânı
Ol gün ümmetine eyler ihsânı
'Âsîler cem' olup dursa dîvânı
Suçlu olanlara dermân ola mı
Bunda günahlara itmeyen tedbîr
Takılır boynuna ateşden zencîr
Dîvân-ı Hazret'e vardıkda bir bir
'Afv eyleyüp suçum ihsân ola mı
Evvel bahâr oldu açıldı güller
Ötdü çemenlerde derdli bülbüller
Söylemez olıcak söyleyen diller
Gözüm yaşı akup ummân ola mı
Nûrdan olur 'âşıkların yüzleri
Her biri bir gevher Nakşî'n sözleri
Gördükde Dost yüzün kudret gözleri
'Akıllar çâk olup hayrân ola mı
Nakşî-i Akkirmânî
Kuddise Sırruh