Envâr-ı Maârifle Tezeyyün Eden Âdem
8 Ağustos 2021 tarihinde yayınlanmıştır.
NUTK-İ ŞERÎF
Envâr-ı ma'ârifle tezeyyün eden âdem
Her rıf'ate her 'izzete her feyze makardır
İnsândaki insânlık olur 'ilm ile hâsıl
Câhil olanın mertebesi rütbe-i hardır
Bir nüsha-i kübrâ denilir âdeme ammâ
Câhillere karşı bu sühan cây-ı nazardır
Bed-hûy olur elbette cehâletde kalanlar
Ahlâkı mühezzeb edecek feyz-i hünerdir
Her matlabı ihrâza olur bâ'is-i yektâ
'İlm ü hüneri sâhibine şânlı eserdir
Rıf'at vererek âdeme tâ subh-i ezelde
Mescûd-i melâik eden işte bu güherdir
'Âlim olanın şân-ı refî'in eder îmâ
Âsâr-ı kemâlâtı ana tâk-ı zaferdir
İnsânda tevâzu' sayılır meşreb-i 'âlî
Hodbîn olanın her işi gâyetde zarardır
Beyhûde te'ellüm ile efkârını yorma
Her iş bu cihânda eser-i hükm-i kaderdir
Çeşmin vâr ise görmeğe lâyık nazar eyle
Ahvâl-i cihân 'âkile mir'ât-ı 'iberdir
Bir öyle kemâlâtı kazan kim ola hâdî
Âsârı ise gıbta-res-i nev'-i beşerdir
Bir 'âciz-i bî-vâye sayıldımsa da Mecdî
Feyz-i ezelî tab'ımıza lutf-i diğerdir
Abdülazîz Mecdi Efendi
Kuddise Sırruh