Esîr-i Kayd u Bend Ka'r-ı Çâh-ı Züll u Isyândır

25 Ağustos 2019 tarihinde yayınlanmıştır.

İSTİMDÂD

Esîr-i kayd u bend ka'r-ı çâh-ı züll u 'ısyândır

Zebûn-i dest-i hükm-i kâfir-nefs-i hevâ-fermâ

Lebâlebdir derûnum nükre-i efkâr-ı fasidle

Dehân-ı yâve-gûyem ana mûm-i kîsedir gûyâ

Fakîr kûçe-i şehr-i salâhım sûretâ lâkin

Benim sâlâr-ı ceyş-i fitne-i 'âlem-i harâb ammâ

Beyaz defter-i a'mal-i hayrım noktadan 'ârî

Kitâb-ı cürme yer yok harf-i vâhid etmeğe imlâ

Gönül bâzîçe-i dest-i hevâdan oldu sergeşte

Netîce şu'le-i cevvâle tıfl-ı nâdân-âsâ

Hidâyet et dil-i gümkerde râha menzili bulsun

Kerem kıl ey Resûl mahrem-i esrâr-ı mâ evhâ

Gönül âyinesi gerd-i kederden hayli muğberdir

Şefâ'at-i musaffân lutfuyla eyle sırf-ı isticlâ

Ola tâ zînet-i mînâ-yı çarhın her sabâhında

Gül-i sadberk mihr-i 'âlem-efrûz cihân-ârâ

Ola ashâb u âl-i hânedân-ı pâkine benden

Selâm-ı bî-hadd ü gâye salât-ı bî-'aded ihsâ

Haremeyn-i Şerîfeyn Kîsedârlarından

Şâir Ömer Nüzhet