Evliyânın Alâmetleri
25 Ağustos 2021 tarihinde yayınlanmıştır.
NUTK-İ ŞERÎF
Cümle taşlar taş demekden dûr değil
Lîk her taş la'l gevher dürr değil
Taş olur kim başlar üstünde durur
Taş olur üstünde hayvanlar yürür
İki türlü arı bir otdan alır
Biri bal eyler biri diken kalır
Fakr hânından yese ehl-i fenâ
Ma'rifet zevk hâsıl eyler hem gınâ
Lezzet-i rûhânîye olur mahal
Nitekim bal arısı eyler asel
Fakr hânından mukallidler hemân
Yeseler buğz u hased olur ayân
Merkeb arısı gibi erdiğini
Sokmak olur dâimâ gördüğünü
Âlim ü âkillere bu söz yeter
Har ne bilsin nidüğün helvâ-yı ter
Kim çevirdiyse bu kesretden yüzün
Anlar anlar ehl-i tevhîdin sözün
Tebdîl olmuşdur kamu abdâl-i Hakk
Anları âdem sanır bu halk
Vecd ü hâlât u riyâzat birle hep
Nûra tebdîl olsalar kılma aceb
Kesb edüp her birisi bir cism-i nûr
Âlem-i ervâha etmişler ubûr
Gel çevir zannın kitâbından varak
Kendine etme kıyâs anlayu bak
Evliyâlar cismini kudret eli
Nûruyla tahmîr edüpdür ey velî
Niye geldiklerin idrâk eyleyüp
Mâsivâdan dillerin pâk eyleyüp
Pek tutup mürşidinin dâmânını
Tekmîle erişdire îmânını
İsteyenler olmağı abdâl-ı Hakk
Mürşidin sözüne tutsunlar kulak
Kim kelâm-ı pîrine fermân olur
Şübhe yok her derdine dermân olur
Cezbe-i zât-ı ilâhî cümleden
Geçire emmâreden levvâmeden
Cüz'iyyâtdan tenzîh edüp zâtını
Süfliyyâtdan döndüre mir`âtını
Eyleyüp varlıkların fi'l-cümle selb
Kamu eşyâ-yı hakîkat birle hep
Anlayup ferdâ-be-ferdâ bildiler
Cümlesin kendinde te'vîl kıldılar
Yoğ iken engür-i zâhirden eser
Her biri sarhoş idi bî-pâ vü ser
Anlara her dem tecellî-i cemâl
Eyler idi dâimâ ol Zü'l-Celâl
Mest ü medhûş bî-te'ayyün bî-vücûd
Bî-hurûf ederler idi Yâ Vedûd
Bu dediğim sana ehlullahdır
Âlem-i gaybdan kamu âgâhdır
Yerleridir mak'ad-ı sıdk-ı Hudâ
Söyleşirler lîk yok savt u sadâ
Evliyâlar kuvveti Hakk'dan tutar
Âlemi yıkmağa bir cezbe yeter
Bedduâ etmezler anlar kimseye
Hakk bakarlar baksalar her nesneye
Bir bölük var dahi ehlullahdan
Gizlidir cismi gedâ vü şâhdan
Anların hiç kimse görmez yüzlerin
Anlamaz bu halk-ı âlem sözlerin
Bir bölük var ki hâssü'l-hâssdır
Bahr-i vahdet içre hep gavvâsdır
Anları abdâl ü ebrâr bilmedi
Kimse anlardan haberdâr olmadı
İstediklerine olurlar ayân
İstemedikleri gözlerden nihân
Cümle bunlar bir denizde mevc urur
Cümlesi bir nûr-i kudretden görür
Esdi çün bâd-ı hakîkat nâgehân
Evliyâlar mevc gibi oldu ayân
Evliyânın zâhir ü bâtınları
Bil bahr-i hakîkat içre anları
Seyyid Nizâmoğlu Seyyid Seyfullah
Kuddise Sırruh