Ey Ahî Ârif İsen Eyleme Aslını İnkâr
24 Şubat 2020 tarihinde yayınlanmıştır.
NUTK-İ ŞERÎF
Ey ahî 'ârif isen eyleme aslını inkâr
Bir avuç hâk-i siyehden yaradıldın ey yâr
Çâr unsurla müzeyyen ederek endâmın
Eylemiş cismin o terkîb ile Hakk cevherdâr
Geç nazar eyleme hâke o senin aslındır
Yine ric'at edeceksin sen o asla nâçâr
Kara toprak diyerek kılma hakâretle nazar
Mâye-i cismin odur buldun anınla reftâr
Seni terbiye edüp bunca zaman batnında
Sızdırup mâhiyyetin etdi vücûdun ısdâr
Nice ni'metler ile ol seni besler hâlâ
Vâcib oldur edesin sen de teşekkür bisyâr
Hadd-i zâtını bilüp kimseyi incitme sakın
Bezm-i ma'nâda olam dersen eğer berhudâr
Bir avuç hâk iken eczâ-yı vücûdun aslı
Yine mağrûrsun ey merdüm-i merdüm-âzâr
Menzil-i ma'rifet 'aşk-ı ilâhîye çalış
Olasın sen de sezâvâr-ı dem-i vuslat-ı yâr
Kıyl u kâl ehline keşf olmadı esrâr-ı İlâh
Sa'y kıl 'ilm-i butûna özün eyle bîdâr
Men aref sırrına erdin ise âdem oldun
Yoksa her sûreti insân olan olmaz hüşyâr
Hâdî esmâsına mazhar olayım d ersen eğer
Hakk nazarla nazar et kimseyi etme ızrâr
'Ayn-ı işfâk ile bak nâsa 'ayb-cû olma
Olmak istersen eğer mazhar-ı lıutf-i sitâr
Her mezâhirde şuûnât-ı ilâhî görünür
Geh hevâî gehi hâkî gehi mâî gehi nâr
Tavrdan tavra giren esfel ü a'lâda O'dur
"Kâbe kavseyni ev ednâ"daki devr-i pergâr
Yoğ iken cümle cihân vâr idi zât-ı Bârî
Zât-ı Bârî'den olup cümle mezâhir izhâr
Halk-ı 'âlem dediği cümlesi Hakk varlığıdır
Çün eser oldu müessir ile dâim seyyâr
Hakk bilir hâssiyyet-i unsûru ehl-i 'irfân
Hakk görür Hakk işidir Hakk'dır eden Hakk güftâr
Hakk'dan özge ne var 'âlemde 'aceb ey vâiz
Hakk'dan özge vâr ise göster eğer bir âsâr
Zerreyi şems-i cihân katreyi deryâ bilesin
Görme ahkar anı sen aslını eyle tezkâr
Kimi Hâdî kimi de ism-i Mudill mazharıdır
Her sıfat fiilini izhâr edecekdir nâçâr
Mü'minin kalbi dürür kenz-i ilâhî el-hak
Ne dilersen dile andan bulasın lutf-i hezâr
Evvel ü âhir ile bâtın u zâhir Hilmî
Sıfat-ı zât-ı Hudâ'dır kamu eşyâ ne ki vâr
Hilmî Dede
Kuddise Sırruh