Ey Altı Günde Yedi Kat Eflâk ile Zemîni Yaradan Mevlâ
6 Şubat 2020 tarihinde yayınlanmıştır.
NUTK-İ ŞERÎF
Ey altı günde yedi kat eflâk ile zemîni yaradan Mevlâ
Kün emri ile hem cümle halkı eyleyen îcâd yoğ iken aslâ
Hem on sekiz bin türlü hayvanât rızkını veren rûz u şeb dâim
Doyar kamusu aç kalmaz biri bulur nasîbin pes gelir ana
Berr ü deryâda hâk ü hevâda taş ü ağaçda rû-yi zemînde
Cânlı olanlar rızkını yerler nesne eksilmez ediser îfâ
Nev'-i insânı dahi yaradup eyledin tekrîm türlü hasletle
Eyledin mü'min anların kimin kimisin müşrik eyledin sana
Dostun Muhammed içün yaratmışsın hem cemî'-i halk-ı cihânı
Hem kendin içün halk eylemişsin ol dostunu hoş mahbûb-i ra'nâ
Kuddûsî'ye hem edüp hidâyet ümmeti kıldın fazlınla anın
Hem sana etdin meddâh ü müştâk eyleyüp tevfîk sen dahi ana
Ahmed Kuddûsî
Kuddise Sırruh