Ey Âşıklar Gizli Nihân Kimden İdim Görülmeden
11 Nisan 2022 tarihinde yayınlanmıştır.
NUTK-İ ŞERÎF
Ey 'âşıklar gizli nihân kimden idim görülmeden
Nerde idim eydün bana bu kârhâne kurulmadan
Ol cihândan bu 'âleme nice geldim eydün bana
İşidenler kala tana ta'ab çeküben yorulmadan
Yer göğe bünyâd olmadan şeş cihete âd olmadan
Bahr ile berde sîl ü mâ bulanuban durulmadan
Yerim iken milk-i 'adem gece idi günüm o dem
Devr edüben milk-i vücûd ak karadan görülmeden
Bilmiş idim âd olanı evvel âhirde geleni
Hakkile bâtıl bileni adım âdem urulmadan
Çarh-ı felek devretmeden gece gelüp gün gitmeden
Âdem gelüp düş görüben ta'bîr ile yorulmadan
Kim biliser toprak u su tahmîrini ne suya çün
Kudret eli karıştırup hikmet ile yoğrulmadan
Kudret suyuyla hikmetin tahmîr-i tînin neydüğün
Kim bilirdi sırdan hafî ne vech ile yoğrulmadan
Rûşenî'den sırrı niçün Gülşenî fâş ider desün
'Aşk ile cân verübeni gönül ile sorulmadan
İbrâhim Gülşenî
Kuddise Sırruh