Ey Cemâlin Ka`besi Oldu Merâm-ı Hâcıyân
12 Ağustos 2019 tarihinde yayınlanmıştır.
NUTK-İ ŞERÎF
Ey cemâlin ka`besi oldu merâm-ı hâcıyân
V'ey celâlin kıblesi oldu garâm-ı 'âşıkân
Vasfına yokdur nihâyet zâtını bilmez 'ukûl
Hem tefekkürden münezzeh bî-tulû' u bî-ufûl
Zerreye etsen nazar hurşîd olur çâr-mekân
Katreye ger iltifât etsen olur 'ummâna kân
Çün muzâf oldu sana yek harf ile ahcâr-ı Tîn
Hoş adı beytü’l-'atîk oldu bu leb kadr-i semîn
Hükmün ile buldu senden çün şeref seng-i siyâh
Bûse-gâh halk olupdur yüz sürer her pâdişâh
Kudretinle çâh-ı zemzem buldu câh-ı bî-kerân
Katresine teşnedir lebhâ-yı cümle hâcıyân
Pest iken cümle cibâl içinde kûh-î ma'rifet
Çün 'inâyet erdi senden buldu kadr-i mekremet
Yeller ile sa'y edüp bulsa tavâf ile safâ
Varmasa ol dağa hâcı haccı olur nâ-revâ
Mâhasal sendendir cümle se'âdet mâyesi
Hem hidâyet ehlinin sendendir sermâyesi
Şemseddîn Sıvâsî
Kuddise Sırruh