Ey Cemâlin "Küntü Kenz"in Gevher-i Yekdânesi
6 Ocak 2023 tarihinde yayınlanmıştır.
.jpg)
NUTK-İ ŞERÎF
Ey cemâlin "küntü kenz"in gevher-i yekdânesi
Genc imiş 'aşkın ki kıldı gönlümü vîrânesi
Kıble-i vechin görelden halk-ı âdem Ka`be'de
Deyr-i mina terkin urdu Kuds iken büthânesi
Vahdetin bahrına giren bildi kim kesret tamâm
Vechine nisbet sadefdir ey cihân dür-dânesi
Düşdü zülfün göreliden bende gönlüm delirüp
Nice kurtula o kaydın bilmezem dîvânesi
Gözlerin sevdâsıdır şeydâ kılan ey meh beni
Serhoş ol sevdâdan olur nergisin mestânesi
Şem'-i ruhsârın görelden tutuşuban yandı dil
Nice yanmasın o şem'in şevk ile pervânesi
Sâkî-i bezm-i ezelden 'aşk ile la'lin meyin
İçeli bildim nedendir ol meyin peymânesi
Gözlerinden esrik olur bir nazar serhoş gören
Câmın içen bilir oldur câm-ı cem meyhânesi
Nâsıh eydür 'aşk ile yandırma cânın pes nidem
Çün ki yokdur andan özge sûziş ile yanası
Söyleme efsâne vâ'iz kıssahâna dönüben
Çün yalandır ekser andan söylenen efsânesi
Uğrasan gönlüme müşfik dilberin kûyinde sor
'Aşk ile mihnet çeküben oldu mu usanası
Vaslına şükrâne diler benden ol zîbâ nigâr
Nakd-i cândan özge nem var bilmezem şükrânesi
Rûşenî'nin mihrine cân vermedin d'in neylesin
Gülşenî bî-dil çün oldur sevgili cânânesi
İbrâhim Gülşenî
Kuddise Sırruh