Ey Dün ü Gün Hakk İsteyen Bilmez misin Hakk Kandadır
11 Ekim 2019 tarihinde yayınlanmıştır.
NUTK-İ ŞERÎF
Ey dün ü gün Hakk isteyen bilmez misin Hakk kandadır
Her kandaysam anda hâzır kanda bakarsam andadır
İstemegil Hakk'ı ırak gönüldedir Hakk'a durak
Sen senliğin elden bırak tenden içeri cândadır
Gir gönüle bulasın Tûr sen ben demek defterin dür
Key güher er gönlündedir sanma ki ol 'ummândadır
Ol 'ummânda yüz bin güher bir katreye benzer tamâm
Ol câna yok zamân zevâl zevâlli cân hayvândadır
Her kanda ki gözün baka Çalap hâzırdır mutlakâ
Şol cân ki tapmadı Hakk'a assısı yok ziyândadır
Eyle sûretini vîrân cân sırrıdır ana eren
Bâtın gözüdür dost gören zâhir gözü yabandadır
Çün sûretin vîrân ola gönlün bâğı cinân ola
Cânın genci vîrân ola çünki bu genç vîrândadır
Her kim gaflet içre geçer cânı zevâl suyun içer
Dervîş sırrı 'arşdan uçar gerçeği yer yüzündedir
Miskîn Yûnus gözün aç bak iki cihân dopdolu Hakk
Sıdk oduna gümânı yak ol eşkere pinhândadır
Yûnus Emre
Kuddise Sırruh