Ey Gönül Gafletden Âgâh Ol Hazer Kıl Zinhâr
7 Ocak 2021 tarihinde yayınlanmıştır.
NASÎHAT
Ey gönül gafletden âgâh ol hazer kıl zinhâr
Mekr eder bidâr-ı hasm olmuş sana bu rûzgâr
Kısmet-i mîras-hordur mülk ü mâlin sandığın
Hubb-i mülk ü cem'-i mâli koy hiç etme i'tibâr
Kıyl ü kâlin hâsılı bahs ü cedeldir hem nizâ'
Ehl-i hâl ol 'aşka teslîm ol selîm ol çekme bâr
Zevk-i rûhânîden ol kim meyl-i zevk-i cism eder
Saltanatdan eylemişdir irtikâb-i züll-i dâr
'İzz ü câh-ı fânî olmuş züll-i 'akl ü çâh-ı cân
Ey 'azîzim câh-ı zilletden hazer kıl görme nâr
'İzz ü câh-ı fânîyi terk eylemekdir 'izz ü câh
İzz-i fânî üzre bâkî 'izzeti kıl ihtiyâr
Kim ki varlıkdan fakat bu 'âlemi bilmiş hemân
'Aşk bahrinden ana ancak görünmüş bir kenâr
Tumturâk-ı nüh-felek şehr-i 'azîm-i 'aşk ile
Hayme-i sahrâdır ol bu pâyitaht-ı şehriyâr
Nüh-felek cevfinde yokdur çâr 'unsur hürmeti
Çâr 'unsur içre bu hâkin ne lutf u kadri var
Böyle ednâ hâkden destinde mevcûd olana
Nâfiz olmaz hükmün ol tebdîl olur bî-ihtiyâr
Geh zebûn-i âsumânsın tâ ki tâli' şems ola
Geh rehîn-i gaym olursun tâ ki olsun katre bâr
Bu cihân dârü'l-belâdır ol cihan dârü's-sürûr
Bu cihan bi'se'l-karîn ü ol cihân ni'me'l-karâr
Zahmet-i dünyâ kadardır ni'met-i 'ukbâ sana
Gurbetin cevri kadar lezzet verir dâr u diyâr
Pîr-i Ken'ân dîdesin bend eylemiş ağyardan
Tâ ki bulmuş Yûsuf-i gümgeştesin ender-kenâr
Şükr-i Bârî gayretimden misl-i şekvâ eylerim
Etmesin tâ her yeten bî-derd meyl-i 'aşk-ı yâr
Meyl-i dâm-ı ankebûtu şevk eder mi her meges
Kadr-i çengâl-i ukâb-ı 'aşkı bilmez her şikâr
Âteş-i 'aşk içre zâhirdir kişinin rütbesi
Cevher-i zer pûte-i zergerde olmuş âşikâr
Tâcir-i 'aşkın ziyânı 'ayn-i ribh olmuş ana
Bu 'imâret münhedim oldukça oldu üstüvâr
Hayfdır 'aşk-ı Kerîm olmak nasîb-i her leîm
Zulmdür bu âteş-i sûzânda yanmak muşt-hâr
'Aşk şükrü kesretinden olmuşam fersûde-dil
Şükürden saykal bulur âyîne-i jengâr-dâr
Allah Allah ismini zikret gönülden bir zamân
Tâ müsemmâ 'aşk nûrundan dola leyl ü nehâr
Bulsa dil sultân-ı 'aşkı rehzen-i dînden ne gam
Rehber-i dûndan ganîdir yok anınçün intizâr
Tâ-be-key mahbûs 'âr u neng olursun 'aşka gel
Kalmasın kalbinde tâ kim 'âr-ı neng ü neng-i 'âr
'Aşkı söyle 'aşkı iste 'aşkı oku 'aşkı bil
'Aşkı gûş ol 'aşkı pûş ol 'aşkı nûş ol 'aşk-hâr
Tâ ki 'aşk olsun vücûdun sende benlik kalmasın
Çünki benlik kalmaz oldur 'ayn-i 'aşk u huşyâr
Bildiğin 'ayne'l-yakîndir gördüğün hakka'l-yakîn
'Âlem olmuş gâr-ı yârin cümle olmuş yâr-i gâr
'Aşk bir hoş meyvedir kim lübb ü kışrı 'aşk u 'akl
'Aşkı bâtın 'aklı zâhir eylemiş bir perdedâr
Bir kabâdır kâmet-i insâna bu şer'-i şerîf
'Aşk ona atlas bıtâne 'akl ona nakş u nigâr
İkisi bir cinsdir lâ bil ki bir şeydir velî
'Aşkdır bahr-i muhît ü 'akldır mevc ü buhâr
'Akl-ı burhânî gibi ger hüsn-i 'aşk olsa 'ayân
Perde-i vehm ü hayâl ü zannı eyler târümâr
Çün nazardan tayyolur tûmâr-ı evhâm u hayâl
Pâk olur mir'at-ı 'âlem cümle kalmaz bir gubâr
Hâr-zâr-ı kesret içre verd-i vahdet seyreden
'Ârifin çeşminde Hakkı 'âlem olmuş lâlezâr
Erzurumlu İbrâhim Hakkı
Kuddise Sırruh