Ey Gönül Geç Her Hevesden Pâk Olup Gel Râha Sen
7 Mart 2020 tarihinde yayınlanmıştır.
NUTK-İ ŞERÎF
Ey gönül geç her hevesden pâk olup gel râha sen
Tâ ki makbûl olasın şâyeste ol dergâha sen
Bu cihân vîrânesin baykuş misâli bekleme
Çün şehin şâhinisin uç var o Şâhenşâh'a sen
"Lâ ilâhe" tîğın al eşyâyı dilden kat' kıl
Hoş hırâm eyle cihân-ı pâk-i "illallah"a sen
Dü cihânın kût-i cânı hamr-ı vahdetdir ger
Nûş idersen mülhak oldun merdüm-i âgâha sen
Çün sana bu kut olur hâsıl ko meyl ü rağbeti
Bir alay hayvân içün olan giyâh u kâha sen
'Aşk ile 'aklın işi yokdur açık söz söyleme
Şîr-i Yezdân şîvesin bildirme her rûbâha sen
'Aşk-ı Hakk'dır 'âşıkın çün yâr-ı gârı dembedem
Hakkı ifşâ etme sırrın her dil-i gümrâha sen
Erzurumlu İbrâhim Hakkı
Kuddise Sırruh